【又係向韓綜致敬?】《降魔的捉妖遊戲》玩法似足《RM》?

上年無綫劇集《降魔的》大受好評,唔少觀眾都認為劇情好、演員做得好,所以被譽為「神劇」,而續集亦已經籌備中。無綫立即食住個勢拍攝網絡劇《降魔的番外篇》,同埋綜藝節目《降魔的捉妖遊戲》。

《降魔的捉妖遊戲》以劇情加上遊戲,講述一宗涉及兩部的士嘅車禍,再加上天文怪現象紅月亮,令8位藝人被帶到異空間。當中有妖魔潛伏,8人要透過一連串遊戲及任務中取得提示,並於48小時內揪出妖魔。點知呢個周末播出後,觀眾發現節目內容同韓國人氣綜藝節目《Running man》勁似,例如將水倒入隊友頭上隻杯度、行石春路及尋找能量水晶確認身份,然後將敵人殺死等等。

雖然CG做得比劇集好,不過有網民認為節目係Hea版《Running Man》,由於內班藝員嘅體能、智慧及合作都好差,而且綜藝感亦唔好,而且啲遊戲仲hea過上次嘅《使徒行者 臥底遊戲》,令人慘不忍睹。

亦有網民話「玩遊戲就玩遊戲啦,又要扮認真做任務。想降魔的mix running man結果變三不象。」,有網民質疑點解《降魔的》靈魂人物馬季(馬明飾)會冇份玩呢?!