【又係人夫?】傳泥鯭陪行寵物店買用品 黃心穎咁樣回應

黃心穎

上年4月,黃心穎被傳媒爆出喺車內纏綿嘅片段令「安心偷食」全城哄動,二人形象雙雙跌落谷底,事業一鋪清袋。事後,許志安就開記者會公開道歉兼宣布暫停手上所有嘅幕前工作。而黃心穎就避走美國8個月,喺上月中高調返香港,佢所主演嘅無綫劇集亦陸續播出。有傳黃心穎想復出,不過唔少網民都話唔想見到佢,仲話要罷睇佢啲劇集。試水溫失敗嘅佢,事業未有起色,不過就被傳媒爆出再偷會疑似人夫,今次嘅男主角係RubberBand成員泥鯭(黎萬宏)。

RubberBand成員泥鯭(右一)

今日有傳媒報道指心穎同泥鯭一齊去咗寵物店,仲話佢哋一路行一路睇寵物用品,期間有講有笑,泥鯭就負責推車仔,之後黃心穎就負責俾錢。喺走嘅時候,泥鯭拎住一箱大紙盒,而心穎就拎兩個購物袋。

睇返黃心穎嘅IG,其實佢啱啱領養咗一隻唐狗仔,仲幫佢改名叫「Love」,心穎仲留言話:「So “Love” just walked into my life. 記得第一次去暫託家庭探佢地三胞胎嗰時、一打開門見到三隻野跳跳紮嗰個樣、好難唔即時俾佢地嘅歡樂感染到。Thank you LAP and her foster parent for their love and care and also the help throughout this adoption process. And super happy to know all 3 puppies have found a forever home!」

而有指男主角泥鯭原本喺2017年求婚成功,大家都以為佢已經做咗「人夫」,不過喺接受傳媒查詢嘅時候,佢就話自己而家係單身,之前諗住結婚,不過最終結唔成,喺上年已經分開咗。

而其後心穎接受傳媒訪問嘅時候,佢就話只係搵一個有養唐狗經驗嘅朋友陪佢買寵物用品,其他嘢就冇回應。

黃心穎
黃心穎
黃心穎