又一BL漫畫登上大銀幕 日本美男love love救地球

日劇《大叔的愛》大受歡迎,直接將腐女口味帶入主流市場,有唔少BL(男男情愛)漫畫陸續被改編成電影或劇集。不久前先為大家介紹過重口味、SM風嘅男男虐戀《性的劇藥》,今日又有另一部作品《Love Stage!!》。

漫畫改編成真人版電影都有唔少中伏例子,劇情改到不倫不類無哂精粹,固然另人失望;改編BL漫畫,故事劇情當然緊要,不過最緊要都係真人版主角個樣夠唔夠美型,無個少女漫畫風嘅外貌,點叫BL!

《Love Stage!!》故事由日本男星Daigo個家姐影木榮貴創作,藏王大志負責繪畫。故事講述出身演藝世家嘅瀨名泉水,老豆係歌手、阿媽係演員仲有個夾band做主唱嘅阿哥,由細都大都被家人游說加入演藝圈,卻因為童年時代被逼男扮女裝做花女,結果出醜收場而對表演有陰影。長大後成為專業宅男,畫功奇差不過立志成為漫畫家。

另一男主角一條龍馬自細見過男扮女裝嘅瀨名泉水後,一見鍾情念念不忘,10年後成為超受歡迎男偶像後重遇泉水,繼而展開熱烈追求,過程有唔少錯摸、搞笑事發生,明乎其實甜故一部!不過甜甜地易入口,所以漫畫大受歡迎,2014年被改編成電視動畫,仲威水到輸出國外,分別推出北美地區及德國版!

圖:杉山真宏twitter

真人版電影將會由原作者影木榮貴改編,故事神粹唔怕改到無哂影,所以漫畫迷最關心係搵咗咩人做主角。宅男得嚟又似女仔嘅瀨名泉水將由舞台劇演員杉山真宏飾演,參加專出靚仔嘅Junon Super Boy模特兒選舉入行嘅佢,顏值唔比同為Junon比賽出身嘅三浦春馬、菅田將暉差!

而一條龍馬將由同為舞台劇演員嘅仲田博喜飾演,身高1米8嘅佢有幾分似吳尊,做舞台劇《刀舞亂劍》個造型又可以好漫畫,成個look唔同哂!真人版男主角外型得到作者高度認可,影木榮貴仲好識賣關子訪問時透露2位男演員一副嬌羞咁話拍戲時錫錫咗好多次,好萌咁話!

圖:仲田博喜twitter

電影預計於2020年日本上映,到時應該會成為腐女界盛事!