【勾起集體回憶】《黃金有罪》炮灰檔期播出 網民反應好唔好?

《黃金有罪》劇照

無綫劇集《黃金有罪》以股市最風起雲湧嘅80年作為背景,講述當年香港經濟發展迅速,股票市場如何改寫年輕人嘅命運。泰國華僑榮木桐(張兆輝飾)由最底層開始做起,一直發奮向上,為求上位不擇手段,最終成為香港首富,不過搞到眾叛親離。《黃金有罪》係無綫近年少有嘅30集長劇,劇集唔經唔覺已經播咗一星期,等我哋一齊睇下網民有啲咩反應啦!

主要睇張兆輝

劇集搵嚟張兆輝帶領蕭正楠、洪永城、姚子羚、陳瀅、黃智賢及何廣沛等人主演,張兆輝喺劇中飾演濚木集團老闆榮木桐,係一位泰國華僑,因父親嘅悲慘遭遇而回流返香港,並立志成為風雲人物。佢聰明、醒目、懂得睇準時機,不過貪婪嘅佢為咗上位同權力,不惜利用身邊人去建立自己嘅王國,例如榮木桐盡顯大鱷本色,利用錢永進(蕭正楠飾)發放假消息,搞到永進身邊嘅朋友及街坊輸唔少錢。唔少網民睇咗幾集後都大讚張兆輝好好戲、好fit、主要係睇佢、霸氣反派角色演得入型入格及如果劇集唔係炮灰檔期出街嘅話,張兆輝有機會爭視帝等等。

《黃金有罪》劇照

不喜歡倒敍形式

劇集一開始就以倒敍方法展開故事,之後幾集不停現在又過去,過去又現在。唔少網民都唔係太鍾意呢個形式,紛紛留言話:「不喜歡咁倒敍方法」、「倒敍再倒敍,唔留心睇真係會亂」、「唔係咁鐘意個敍述模式」及「又玩現在>過去>現在, 內容鬆散, 亂又無主線. 垃圾劇.」等等。

時代背景有共鳴

劇集背景以經濟起飛嘅80年代作為背景,劇中演員嘅造型及道具都有參照潮流及環境,唔少觀眾都大讚有誠意。另外,劇集當中亦有唔少生活情節及環境勾起觀眾嘅集體回憶,例如水敏晶(姚子羚飾)及錢永進喺食飯時間爭睇電視,水敏晶要睇《家變》,因為佢以洛琳作為榜樣。

《黃金有罪》劇照

陳瀅好索

陳瀅喺劇中飾演水敏婷,佢係一個性格開朗及貪慕虛榮嘅女仔,與莊帶喜(洪永城飾)及錢永杰(何廣沛飾)有感情線。陳瀅喺戲中有唔少靚靚造型,佢出場後,唔少網民都大讚佢好靚、好可愛、表情得意及電死人等等。

鷲哥is back

上星期劇情就講述榮木桐喺泰國嘅時候,爸爸(姜大偉飾)想脫離龍坤記控制,於是就求黑社會頭目龍坤(吳岱融飾)俾佢退出,之後龍坤派人捉咗榮木桐去佢間拳館,期間龍坤霸氣盡現及要求姜大偉舐佢腳板,不過可惜後來被榮木桐放火燒,生死存疑。唔少網民睇完都話龍坤好有鷲哥feel、好正,雖然吳岱融只係客串,不過就已經搶鏡成功等等。

《黃金有罪》劇照
《黃金有罪》劇照
《黃金有罪》劇照
《黃金有罪》劇照