劉晨芝被「正印」踢爆下巴 浴血報警

東方日報
劉晨芝在醫院接受治療,衣服染血。

歌手劉晨芝昨日凌晨於夜店消遣,因過枱與友人打招呼,疑引來一名外籍女子醋意大發,突然向劉晨芝施襲,連環三腿踢爆她下巴,兩道傷口最長一條長兩吋,急縫十針才能止血,她哭訴已經報警,揚言一定追究到底。

慘被襲擊受傷的劉晨芝,昨日講述事發經過時仍猶有餘悸,身心疲累的她在電話中傳來沙啞聲音,咬字不太清晰,坦言哭了一晚:「尋晚(13日)凌晨兩點,我同朋友喺中環夜店飲嘢,隔籬枱我都有朋友喺度,我就過枱同朋友打招呼,我從來對人好友善,唔會有惡意,當時我企喺度,隔籬枱有個外籍女仔坐喺度,突然向我起腳踢,連環踢咗我三腳,我都唔知發生乜事,太快,我畀人踢到跌低咗,只覺得個頭好暈,見到自己一身都係血,當時都唔知咁傷。」

縫十針留疤

因事出突然,周遭的人都好混亂,施襲者趁亂離開,劉晨芝表示只知有人抱她登上救護車送院,在瑪麗醫院有警員為她錄取口供,之後轉到養和醫院接受治療,至昨早九時才回家,受驚足足7個小時,回家更換衣服,看到衣服連內衣都染滿血,忍不住大喊一場。

最慘是下巴重創的兩個傷口,縫上十針,原本她接了荷里活電影並預計下周赴美國開工,擔心傷勢令工作受阻,她語帶哽咽說:「醫生話一定有疤!演戲要有動作同表情,我依家講嘢都口齒不清,傷口好痛唔可以大動作,都擔心將來唱歌會受影響。」對於施襲者,她憤慨地說:「我未見過呢個女仔,唔識佢,唔知道佢係咪飲High咗,定係因為我同佢男友打招呼而呷醋,我覺得太離譜,落口供時警察都話個傷口好深,呢啲事可以發生喺任何人身上,唔想再有人好似我咁,我一定會追究,唔可以就咁算。」

下巴受重創,兩個傷口要縫針。
腳上亦血漬斑斑。
今次劉晨芝無辜受襲,真係慘!