劉嘉玲爆初出道被鄭裕玲鬧過:自此我更認真工作

1 / 1
劉嘉玲爆初出道被鄭裕玲鬧過:自此我更認真工作

鄭裕玲(Do姐)出咗名認真,連劉嘉玲都話初出道時好驚佢,Do姐日前邀請咗嘉玲上佢嘅電台節目,佢好直接咁問嘉玲:「我有無鬧過妳?」嘉玲話:「有,嗰時真係好細個,好貪玩,啲稿又難背成日背唔熟,您又出咗名勤力認真,真係背到個劇本滾瓜爛熟,有一次我背唔熟啲對白,俾你發現咗,問我:『你知唔知場戲講乜?』我當時勁心虛答您:『知知哋』。」Do姐問:「咁你有無嬲我?」嘉玲話無:「經歷果次,我自此就好認真對待我嘅工作。」睇嚟Do姐嘅認真工作態度都對嘉玲有正面嘅影響,嘉玲仲大讚Do姐有幾認真:「6點嘅通告,佢5點半就到,咁早到仲自己燙埋衫。」

其實Do姐同嘉玲之後就做咗朋友,間中仲會約埋食吓飯,Do姐出咗名養生,好早瞓覺休息,佢大爆嘉玲相反:「佢真係好貪玩,同佢食完飯,佢原來仲有下一場,一晚幾個飯局,又鐘意去蒲。」嘉玲就話:「好在我當年有去蒲,依家香港無咩好嘅蒲點,好懷念當年個個都著得好靚咁去蒲,依家無人咁做。」

最後佢哋講起雖然大家都已經搵夠,但依然好熱愛工作同娛樂圈,所以從來無停過落嚟,好似嘉玲咁,就依然好活躍:「我好多嘢做㗎,要拍電影、廣告、真人騷、出席活動,仲有做生意添。」除咗呢啲,閒時仲有同發哥一齊行山,講起發哥,Do姐就投訴話邀請咗發哥上佢節目做嘉賓幾十次,但都約唔成,嘉玲話:「咁您搵發嫂安排好啲。」

鄭裕玲幫劉嘉玲翻三十年冤案 拖埋周海媚落水:佢先係遲嗰個

點擊瀏覽《香港01》更多內容和圖集

你可能感興趣:
鄭裕玲幫劉嘉玲翻三十年冤案 拖埋周海媚落水:佢先係遲嗰個
【吐槽大會】林雪5分鐘棟篤笑 連劉嘉玲都寸:聽說她專拍爛片