劇集題材夠貼地 《婚姻合伙人》開播獲好評

土地問題係香港而家最難解決嘅問題之一,而無綫啱啱播出嘅新劇《婚姻合伙人》就係講兩位主角楊明同高海寧(高Ling),由合作經營劏房到開地產代理公司嘅故事!套劇喺2017年開拍﹐雖然爭少少變左倉底貨,不過而家睇返又唔覺得過時,而且仲夠哂貼地!

呢套輕鬆小品,由楊明同高海寧首次擔正做男女一,雖然兩位都係第一次擔正,但係已經好有火花,尤其係劇中飾演「大暖男」郎朝勇嘅楊明,坦白講啲表情雖然係浮誇咗啲,不過做一個精靈古怪、表情多多嘅喜劇型男都算幾好啦。

至於女一由高Ling飾演嘅貪錢港女貝競枝,因為自細畀爸爸遺棄,而缺乏安全感,所以做咩事都向錢看,而做咗地產經紀就更加咩都錢行先。所以佢寧願一個人生活,亦自覺融入唔到有屋企人嘅世界。自從3年前認識當時仲做緊裝修師父嘅朝勇之後,就開始合伙經營劏房同拍拖啦!不過因為大家價值觀好唔同,所以關係一度反目成仇添…..至於最後係點,自己睇啦!

由第2集出場嘅朝勇阿媽(黃淑儀飾)開始就更加爆笑連場,淨係嗰場因為同高Ling呢個未來新抱當街嗌交,而一怒下將人推咗落海嗰一幕真係勁爆,仲要連Gigi姐自己都跳埋落海,實行「阿媽同老婆一齊跌落海,阿仔係救邊個」呢招真係超爆!

另外,由陸永飾演郎朝勇嘅孿生細佬郎朝仁 ,呢個超級自卑宅男,成日都比人蝦同誤會﹔好似喺電梯被屈滅高ling屁股而食死貓, 又唔記得拉褲鏈,搞到當街當行俾人笑,真係睇到都戥佢唔抵。

睇宣傳片嗰時,大家已經知有一個護士角色,就係郎朝勇個妹郎朝信(湯洛雯飾)。本身就已經有靚湯之稱再加上護士嘅制服誘惑,唔知最後唔知可唔可以成功追到黃德斌飾演嘅型男富豪花花公子呢?

仲有個不得不提嘅角色,就係張嘉兒飾演嘅千秋置業採購部經理李智琪,恃住自己係朝勇舅父徐懿蜚姨仔,黃馬褂作威作福。其實呢個咁有心計嘅角色都幾大發揮,所以大家都要留意。

最後,唔知大家有冇留意有首好好聽嘅主題曲《抱擁情人》 呢?歌曲由胡鴻鈞(Hubert)主唱,加上歌詞寫得夠貼題有意思,唔少人都大讚好聽。