劇集收視仆直 細數近年無綫收視毒藥

好多人話一套好嘅劇集,自然會有好嘅收視。不過如果觀眾對劇中嘅藝人冇興趣或者反感嘅話,觀眾會越睇越走,收視可能會低到谷底,劇中嘅演員更會成為眾矢之的,唔知以下呢幾位係唔係大家心目中嘅「收視毒藥」?

譚俊彥‬

「狄龍之仔」‪譚俊彥‬(Shaun)喺2016年加入無綫,之後就立即成為一線小生,參演嘅劇集仲套套都係男主角,分別係《天命》、《特技人》、《包青天再起風雲》,仲有待播劇《十八年後的終極告白》及《法證先鋒IV》。雖然Shaun嘅演技不俗,不過有佢演出嘅劇集收視就認真麻麻,好似《天命》全劇平均收視只有21.5點及《包青天再起風雲》全劇平均收視只有23.1點,似乎觀眾緣唔係太好。

洪永城‬

‪由有線電視過檔去無綫,一開始係夥拍黃翠如做旅遊節目主持,仲好快成功上位,之後仲喺唔少劇集做男主角,例如《單戀雙城》、《張保仔》、《實習天使》及《波士早晨》等等。不過大家最記得嘅一定係《張保仔》,佢嘅演出被網民狠批口齒不清,認為佢唔適合拍劇,完全冇大將之風,仲話見到佢就想熄電視及話佢係歷年演技最差嘅台慶劇男主角。

‪陳凱琳

陳凱琳‬(Grace)貴為雙料港姐冠軍及國際中華小姐冠軍,一入行就被無綫力捧上位,喺唔同嘅劇集都擔演重要角色,甚至係女主角,例如‬《名門暗戰》、《四個女仔三個BAR》、《張保仔》及《巨輪II》等等。一向都冇乜觀眾緣嘅陳凱琳,過去不停被網民指佢鍾意瞪大眼睛做戲、表情浮誇、經常尖叫及演技生硬等等,所以只要劇集收視唔好,網民嘅矛頭都會直指向佢。直至《平安谷之詭谷傳說》,佢嘅演技先有進步,睇嚟Grace真係要多謝老公鄭嘉穎啦!

‪黃翠如‬

過檔無綫後,黃翠如‬就孖住洪永城拍攝旅遊節目,好快就被無綫高層睇中,獲得力捧成為小花。不過自從演出《舌劍上的公堂》後,唔少網民都紛紛批評佢嘅演技,認為佢演戲淨係得一個表情,不過你有你dislike,佢有佢繼續拍劇,仲差唔多套套都係做女主角。佢主演嘅大部份劇集平均收視都唔會超過26點,例如《師父·明白了》23.7點、《幕後玩家》23.6點及《使徒行者2》23.95點等等。好多網民都認為佢唔適合拍劇,都係主持返旅遊節目啦!

‪田蕊妮‬

06年由亞視過檔無綫,13年更憑《巨輪》榮升視后。阿田嘅演技相信冇人會質疑,有唔少佢主演嘅劇集都有唔錯嘅口碑及收視,好似《讀心神探》、《巨輪》及《鬼同你OT》等等,當時《鬼同你OT》同胡定欣嘅神同步更引起網民熱烈討論。不過可惜之後嘅《來自喵喵星的你》就令網民好反感,因為頂唔順佢喺劇中扮可愛,劇集收視只有20.8點。另外,喺2017年無綫播出倉底劇《蘭花刼》,劇集成為無綫史上10大低收視劇集第一位,只有18.1點。

‪陳豪‬

陳豪形象健康又有觀眾緣,點解佢都會係「收視毒藥」?近年拍劇唔多,對上一套出街嘅已經係2017年嘅《誇世代》。陳豪一向都係飾演比較正面嘅角色,所以一直深受觀眾歡迎。但係直到2016年《潮流教主》以及《來自喵喵星的你》嘅出現,就開始有唔少網民批評陳豪嘅演技,因為表情生硬,當中劇集所穿着嘅衣服及髮飾,實在令人有一種想轉台嘅感覺,明明一個又健康又靚仔嘅陳豪,最終變成「收視毒藥」。