【有共鳴感】《BB來了》獲正面評價 網民:劇情夠貼地

由李佳芯(Ali)與黎諾懿主演嘅新劇《BB來了》喺星期一已經出街,劇集以陪月為題材,講述新手爸媽嘅生活點滴,夫妻唐恬兒(李佳芯飾)和葉致廷(黎諾懿飾)喺毫無準備意外有咗BB,令二人不知所措,被逼放棄原本嘅生活。本來想搵雙方父母幫手,但佢哋嘅育嬰方式極度唔同,經常發生爭執,所以就請金牌陪月員王佳妙(楊卓娜飾)幫手。睇咗兩集後網民對套劇都有不少正面及負面嘅評價。

1. 劇情輕鬆寫實有共鳴感

無綫向來拍小品劇都有一手,好似上年嘅《親親我好媽》以香港教育為題材,唔少網民大讚劇情貼地及有共鳴。今次劇情輕鬆寫實,道出唔少家庭及社會問題,例如香港住屋問題、新手媽媽嘅徬徨、婆媳關係、女強人對生B嘅態度及男人面對家庭同工作嘅壓力等等。劇集只係播出兩集,已經講出咁多問題,唔少網民已經大讚劇集有共鳴感。

2. Ali演技自然有進步

有女神Ali做女主角已經成功吸引一班網民收睇,但Ali絕對唔係得個樣。今次Ali喺劇中飾演新手港女媽媽,經常要向老公黎諾懿發脾氣,搞到面容扭曲,不過佢都冇就住就住。唔少網民大讚Ali豁出去、演技有進步、好自然等等。相反男主角黎諾懿嘅演技,就被網民指係「馬壯」式演技同喺《燦爛的外母》入面嘅演技一模一樣,睇到有少少悶。

3. Ali假肚勁假

身材勁fit嘅Ali要演大肚婆,當然要搵道具啦,不過劇中嘅假肚真係勁假,肚臍勁凸兼肚皮望落好膠同好硬,完全一啲都唔似。

4. 多實力派演員

劇中搵咗陳秀珠、羅樂林及盧宛茵飾演外母、外父及奶奶,佢哋一出場就完美飾演角色,好似陳秀珠同盧宛茵,一個飾演屋村師奶,一個飾演過氣闊太,成功演到外母及奶奶嘅嘴臉。喺頭兩集已經好搶鏡,唔少網民都大讚佢哋嘅演技爐火純青,演得入型入格。

5. 又翻唱舊歌
唔知無綫係唔係眼見上次《不懂撒嬌的女人》搵譚嘉儀翻唱盧冠廷嘅《陪着你走》做插曲成為熱話,更深受網民歡迎,所以今次照辦煮碗搵搵譚嘉儀翻唱陳百強嘅經典歌曲《有了你》做主題曲。不過今次唔少網民鬧爆留言話破壞經典歌、唱到就斷氣咁、編曲改到好奇怪、把聲懶sweet其實好作狀等等。