【前路茫茫】郭少芸約滿在即 無綫未搵傾續約

《丫鬟大聯盟》劇照

近年無綫不時有藝人離巢消息,好似最新就有劉江老師及田蕊妮。除咗呢兩位之外,其實近日仲有郭少芸約滿在即嘅消息傳出,但有指公司仲未搵佢傾續約。

郭少芸喺無綫做咗28年,雖然曾兩度離巢,分別係2001年與家人合資開餐廳,及2018年再度離開北上發展,不過之後又重新簽約。佢大部份青春都俾咗無綫,但今次面臨不被續約危機,佢都有啲擔心,因為《丫鬟大聯盟》同《大醬園》陸續出街,佢有份演出嘅劇集已經冇晒存貨。日前接受傳媒訪問嘅郭少芸就話公司唔想簽你嘅話,佢就會播晒啲存貨,而佢嘅合約就快完,不過仲未搵佢續約。

51歲嘅郭少芸喺1992年參選港姐,其後加入無綫成為藝員,多年來曾經飾演唔少為人熟悉嘅角色,例如有《真情》嘅「細孖」李多欣、《愛·回家》嘅「孻姑」馬柔、《同事三分親》嘅Queenie及《律政強人》Pat姐等等,演技備受觀眾肯定。

唔知今次呢套《大醬園》,會唔會成為郭少芸喺無綫最後之作?

郭少芸
郭少芸