前亞視藝人吳廷燁 被傳加盟無綫

雖然亞洲電視已經「熄機」,不過無可否認亞視旗下一班藝員實力的確有番咁上下。就好似過檔咗去無綫嘅陳展鵬、田蕊妮、江美儀及「游生」袁文傑,演技令人眼前一亮。近排有網民話將會再有一位亞視藝人過檔無綫,佢就係吳廷燁!

雖然佢大部份劇集演出都係喺亞視,不過其實佢都係畢業於TVB藝員訓練班,同屆同學仲有周星馳、梁朝偉、吳鎮宇等。其後佢就參加咗ATV藝員訓練班,之後就繼續效力。大家應該仲對佢喺《我和殭屍有個約會》飾演外剛內柔嘅殭屍「堂本真悟」(KEN)印象深刻。直到2006年佢正式離開亞視,轉向電影同內地電視劇方面發展。

唔少網民收到呢個消息後都一面倒讚好,仲話想佢加入無綫好耐,大讚佢係演技派,仲提議不如可以開套劇俾亞視舊將等等。

諗落,真係拍套咁嘅劇的話,有齊鮑姐、阿田、煎pang、游生、江美儀同吳廷燁的話,台慶劇嘅卡士喎!