《刑事偵緝檔案》籌備開拍第五輯 陶大宇郭可盈古天樂宣萱角色由邊個做?

《刑事偵緝檔案》系列(網上圖片)

無綫劇集《法證先鋒IV》喺聽晚播出大結局,而劇情亦都越來越緊湊,口碑及收視都相當不俗。其實以往無綫都有唔少經典劇集開拍續集,例如《法證先鋒》、《妙手仁心》、《On Call 36小時》、《降魔的》及《使徒行者》等等,繼早前《陀槍師姐》第五輯正式開拍後、最新就傳出《刑事偵緝檔案》都將會開拍續集。

《刑事偵緝檔案》喺前年深夜時段重播,唔少觀眾都捱眼瞓收睇,成功掀起深夜追劇熱潮。近日網上流傳《刑事偵緝檔案》準備拍攝第5輯,更以美劇形式拍攝,並提到第5輯與早前4輯冇任何故事關聯,不過相信大家最關心嘅係邊位藝人有份參與,會唔會有「大勇」陶大宇同「Jessie」郭可盈或者「徐飛」古天樂同「Quin」宣萱呢?早前有消息指劇組計劃搵王浩信、袁偉豪、姜皓文、張振朗、黃智雯及惠英紅,不過最新就有消息指係會由陳展棚及姚子羚主演。

有傳媒就向監製關樹明求證,而佢就話劇集係喺籌備當中,而陣容方面就仲未確定,落實咗就會公佈。