刀仔手下「烏鴉」黃斌 與「賭神」發哥同框合照 被眼利網民發現

由莊文強自編自導,周潤發(發哥)及郭富城主演嘅跨國犯罪動作片《無雙》喺上星期正式上映喇!一向親民嘅發哥近日就率領電影隊伍去到台灣做宣傳,期間發哥去公園晨跑同埋與發嫂搭捷運都被台灣網民捕獲自拍。噚日發哥仲同埋電影攝製隊去陽明山國家公園跑步,喺同攝製隊人員合照相片中,竟然被眼利網民發現好耐冇喺影幕出現嘅面孔,呢個人就係黃斌!

淨係講黃斌呢個名字,大家可能唔係好知佢係邊個,其實佢就係當年喺電影《賭神》「刀仔」劉德華忠心耿耿嘅好兄弟「烏鴉」。黃斌喺幕前發展平平,大多數都係飾演綠葉角色,除咗《賭神》嘅「烏鴉」一角之外,佢亦參演過唔少電影,例如《中華英雄》、《殭屍至尊》、《決戰紫禁之巔》、《人皮燈籠》及《旺角卡門》等等。一直有參與幕後工作嘅黃斌,慢慢退出幕前,主力幕後,至今已經係27套電影嘅製片、8套電影嘅執行監製、7套電影嘅執行監製及4套電影嘅策劃等等,13年監製嘅《竊聽風雲3》仲入圍第34屆金像獎「最佳電影」,今次《無雙》都係由佢監製,行內嘅地位舉足輕重,認真犀利呀!

唔少網民見到今次「賭神」同「烏鴉」同框合照都覺得好驚喜同好興奮呀!