【凍齡有道】網上票選無綫美魔女 呢十強真係實至名歸

而家嘅女士們真係好勤力去保持自己美態,唔少TVB女星由以前嘅少女變為而家嘅美魔女。最近有網民搞咗個無綫花旦美魔女選舉,我哋一齊睇下現時嘅排名啦!

第十位:康華(46歲)

入行以嚟發展一般嘅康華,近年憑《刀下留人》萬貞兒被網友封為「最正奸妃」及喺《宮心計2深宮計》飾演心地善良嘅南宮司設,成功搶鏡,深受網民愛戴。觀眾除咗鍾意康華精湛嘅演技之外,更加留意到佢雖然已經年過40,不過依然身型fit爆、散發迷人韻味,真係羨慕死人啦!

第九位:宣萱(48歲)

90年代已經出道嘅宣萱,拍過唔少經典劇集,例如《難兄難弟》、《尋秦記》、《戇夫成龍》、《洗冤錄》、上年嘅《不懂撒嬌的女人》及《使徒行者2》等等。48歲嘅宣萱真係保養得宜,咁多年都好似唔識變老咁。

第八位:周海媚(51歲)

周海媚(海味)由出道至今有兩大經典角色,《倚天屠龍記》被封為「最美周芷若」將主角演繹得淋漓盡致,深入民心及《今生無悔》入面飾演嘅沈文薏。近期轉戰內地嘅佢拍攝新版《倚》劇,今次竟然係飾演心狠手辣「滅絕師太」,網民大讚佢仍然散發仙氣,個樣可以話多年不變,再獲封為「史上最美的滅絕師太」。

第七位:佘詩曼(43歲)

97年港姐季軍入行,由一臉稚氣嘅《十月初五的月光》祝君好、《西關大少》何雙喜,到近年嘅《使徒行者》丁小嘉及大熱人氣《延禧攻略》嫻妃。保養有方嘅佘詩曼就算喺《延禧攻略》拍埋其他年輕演員旁邊都唔係差好遠,身材同外貌都睇唔不出年紀原來已經踏入40大關!佘詩曼由以前嘅少女味到現時越拍越有權勢越女強人,再慢慢變成今時今日嘅「三料視后」!

第六位:吳婉芳(51歲)

吳婉芳係1986年香港小姐亞軍、最上鏡小姐及才華小姐,之後簽約無綫開始拍劇,曾因推卻《誓不低頭》岑凱欣一角而被無綫雪藏,但婚後淡出娛樂圈。吳婉芳成為豪門少奶奶,甚少出席公開社交活動,每次拉頭馬都令人感到讚嘆。、

第五位:萬綺雯(48歲)

擁有42吋長腿嘅萬綺雯(蚊蚊),由出道到而家都有一副Baby face。由亞視《我和殭屍有個約會》飾演嘅馬小玲,到無綫《老表,你好野》飾演嘅易雪飛,可以話「蚊蚊」嘅樣依然少女,美魔女呢個稱呼真係當之無愧呀!

第四位:黎姿(47歲)

黎姿(現改名為黎珈而)2008年與富商馬廷強結婚後亦都淡出演藝圈、投身商界。現時事業有成嘅佢,可以話似凍齡嘅少女一樣,好似食咗防腐劑咁,完全睇唔出原來已經47歲!

第三位:姚嘉妮(40歲)

姚嘉妮身為98年亞姐季軍,有身材個樣又有氣質。近年更因為要照顧小朋友而減少工作,但係做事仍然專業。而近年TVB到見到佢大多數飾演人妻角色,索爆之餘更添一份女人味。今年更憑《BB來了》飾演過氣MK妹陪月員許朗,打扮MK經常穿熱褲大騷長腿,凍齡外表加上窈窕身型,真係睇唔出已經40歲。

第二位:楊卓娜(41歲)

2001年參加香港小姐後加入無綫嘅楊卓娜係楊怡家姐,以往演藝路可以話名氣不大而相信大家最有深刻印象嘅應該係《愛‧回家》入面「霞姐」呢個名,霞姐角色相當搶眼,亦開始令網民慢慢留意到女人味漸漸濃厚嘅卓娜。事業慢慢漸有起色,好似最近喺《跳躍生命線》中飾演喪夫嘅游子嵐,成功演活堅強新抱,獲網民大讚。

第一位:陳煒(44歲)

煒哥可以話係一個性感性濃嘅美魔女,從亞視過檔到無綫,周不時都會飾演較性感或女強人嘅角色。近年仲活躍一線,今年嘅《果欄中的江湖大嫂》李夢露及《宮心計2深宮計》太平公主都表現亮眼,唔少網民都認為煒哥有機會成為今年視后。除咗係演得嘅美魔女藝人,2016年仲開始拍攝飲食節目,可以話係「入得廚房 出得廳堂」。即使已經44歲都保養得好好,好似唔識變老一樣。