《再創世記》又飾演奸角 重溫郭晉安反派角色

無綫神劇《創世紀》當年收視及口碑極佳,深得觀眾喜愛。相隔近20年,無綫製作被視為延續篇嘅《再創世記》,劇集喺今晚正式開播啦!雖然《再創世記》冇咗羅嘉良、陳錦鴻、古天樂、郭可盈及蔡少芬等人孭飛,不過就搵咗舊班底嘅「三屆視帝」郭晉安帶領周麗淇、楊怡、林文龍、袁偉豪及周柏豪等人主演。今次郭晉安將會由善良戇直、樂於助人嘅「馬志強」變成不擇手段、奸到出汁嘅商家「賀天生」。安仔入行超過30年,忠奸角色都可以成功駕馭,過往都飾演過唔少奸角角色,今日我哋就同大家重溫一吓啦!

《超能幹探 Super Cop》飾演陳一賢(1993年)

呢套劇係安仔第一次做奸角,劇中佢飾演警察陳一賢,同好朋友方志強(劉錫明飾演)一齊考入警隊,不過方志強因為一次意外後擁有超能力,事業步步高升,仲連女朋友都俾方志強撬走埋,所以陳一賢好妒忌佢,慢慢累積咗唔少憤恨,不惜做黑警向犯人學習特異功能,夠後天努力學習俾方志強更犀利嘅超能力,最後變成犯案無數嘅通緝犯。

《笑看風雲》飾演潘朗清(1994年)

商戰劇《笑看風雲》當年播出時成為全城話題,除咗鄭少秋、鄭伊健及古巨基外,飾演奸角嘅郭晉安成功將角色發揮得淋漓盡致,備受觀眾關注。安仔喺劇中飾演潘仲(朱江飾)個仔,自細被寵壞、為人急功近利、不擇手段,之後仲越嚟越奸同無人性,壞事做盡嘅佢放火燒自己間屋、踢老豆落樓梯搞到佢失憶、害死林貞烈(陳松伶飾)及邵家慧(馬清儀飾)。

《離島特警》飾演王安順(1998年)

安仔喺96年離開無綫,之後98年回巢拍劇,劇集《離島特警》以坪洲做背景,搵嚟呂頌賢、郭晉安及宣萱飾演,今次係安仔第三次做奸角,喺劇中飾演一個憤世嫉俗、重情重義但係不善於表達自身感情嘅王安順,佢自細離家出走,但係被賊贓嫁禍而無辜入獄。放監後本來想重新做人,不過之後又被格硬參與犯案,之後避回坪洲。點知俾楊家聰(呂頌賢飾)發現佢就係悍匪,最後自首入獄。雖然劇名叫《離島特警》,呂頌賢擺到明係主角,不過安仔完美演繹嫉惡如仇嘅角色,搶咗唔少風頭,人氣急升。

《刑事偵緝檔案IV》飾演鄭東成(1999年)

雖然安仔喺《刑事偵緝檔案IV》只係特別演出三集,不過仍然令人留下深刻印象。佢喺劇中飾演黑社會成員鄭東成,雖然係反派角色,不過就對朋友同兄弟有情有義。本來好欣賞徐飛(古天樂飾)嘅能力,仲成為好朋友,不過之後徐飛嘅臥底身份被發現。鄭東成就向佢報復,綁架咗佢女朋友芊芊(向海嵐飾),最後被捕。

《與敵同行》飾演唐立言(2008年)

佢飾演表面正人君子、背後陰險嘅唐立言,喺劇中壞事做盡,殺人後嫁禍給表兄張承希(鄭嘉穎飾),搞到對方坐咗十幾年冤獄,之後佢仲試過將患有柏金遜症的嘅養母(呂珊飾)拋落地。就算最後佢半身癱瘓坐緊監,一啲悔意都冇仲諗住坐完監出去報仇。佢對住鏡頭奸笑嗰一幕,真係睇到觀眾不寒而慄,呢個角色更成為最受歡迎嘅奸角之一,洗走阿旺味。

《忠奸人》飾演高哲行(2014年)

喺《忠奸人》安仔挑戰亦正亦邪角色,飾演一個因警察張立勳(吳卓羲飾)追捕劫匪時被誤傷,導致雙腳癱瘓兼家庭破碎嘅律師高哲行。雖然之後要以輪椅代步,但佢仍不安於現狀,時時刻刻都想上位。重遇吳卓羲後,佢表面扮冇嘢,其實佢滿腹陰謀,等緊機會報復,最後佢為留住譚美貞(田蕊妮)自首入獄,不過佢其實未有真正改過。安仔出色嘅演技,睇到觀眾心寒又肉緊,角色仲為佢第三度贏得視帝獎項。