冇晒口罩要返工 盧宛茵包保鮮紙頂硬上

相信唔少人都同盧宛茵一樣買唔到口罩...

全城一罩難求,就連無綫資深藝人盧宛茵(Madam Lo)亦未能撲得口罩,喺用晒所有合規格嘅口罩後,無計可施下惟有靠一個棉布口罩,內夾廁紙,外面包上保鮮紙,暫時頂住上抗疫,日前更要返人流較多嘅公司試造型,情況令人擔心!

獲贈口罩唔捨得用

其契仔鄭敬基得悉後,立即送上口罩,並喺社交網發文:「得知後個心好酸,即刻約咗佢今天試造型後,從本來配給好些朋友的供應中抽調一些出來,給Madam Lo及其女兒兩週每人每天一個的供應,相約地鐵站交收。一見面立即拿出一個新的幫她戴上,戴上的一刻心是酸到不得了。我叫Madam Lo頂住先,我幫她再搵叫她放心。然後我叫她快回家!她還説唔捨得用,問我幾錢。」


好彩鄭敬基知道情況後,立即送口罩畀盧宛茵!