【冇得睇大王無敵鴛鴦鏟】傳《都巿閒情》10月暫停由新節目《Big City Shop》頂上

隨著Big Big Channel嘅出現,無綫已經喺唔同渠道不停宣傳。早前一直有傳無綫長壽婦女節目《都巿閒情》會進行改革,今日就傳出《都巿閒情》將會改名,新節目暫叫《Big City Shop》。

由1992年開始播出嘅《都巿閒情》逢星期一至五喺下晝播出,每集45分鐘,節目內容主要圍繞時事、健康、烹飪、生活享受、藝術表演、等等,每集仲會邀請唔同嘉賓做訪問傾下計,節目係唔少師奶嘅至愛。不過要數最受觀眾及網民歡迎嘅一定係安德尊同李錦聯呢一對死敵,佢哋自09年喺節目環節《今晚食乜餸》開始互窒鬥氣,幾乎集集都開火,有時安德尊仲會示範吓「無敵鴛鴦鏟」,唔少觀眾及網民大叫過癮。不過可惜李錦聯喺上年已經離開無綫,大家都冇得再睇佢哋互窒都覺得好唔習慣。

除咗《今晚食乜餸》之外,節目都仲有唔少經典環節,例如有阿舜唱《娃娃愛天下》嘅演藝比拼環節《鬥戲連唱鬥一番》、然後家庭觀眾以郵寄方式回答問題主持人問題,答啱而又抽中嘅家庭觀眾可以獲得逾港幣萬元獎金和獎品嘅《萬元巨獎送大禮》及邀請名人或藝人同參觀佢哋嘅屋企,一個介紹室內設計嘅環節叫《登堂入室》等等。

26年嚟都有唔少人主持過《都巿閒情》,好似有盧念國、鄺佐輝、朱維德、楊瑞麟、曾近榮、羅貫峰、譚小環、溫裕紅、劉文娟、羅敏莊及劉錦玲等等,而現任嘅主持就包括有安德尊、章志文、張景淳、林淑敏、姚嘉妮及彭慧中等等。雖然有指新節目繼續會由《都巿閒情》趙麗平監製,不過主持方面有冇變動就仲未知道。

其實淨睇個新節目名已經估到有機會係幫Big Big Shop嘅產品做示範,一條龍服務咁,例如烹飪環節就可以用廚具或食品品牌贊助嘅產品,之後完美示範完順便sell埋觀眾去Big Big Shop買?! 亦有可能到時家庭觀眾答啱問題,仲可以送埋大明猩公仔俾家庭觀眾添呀!