《全民造星2》下週一首播 邊位仔仔最有星味?

《全民造星2》

上年ViuTV嘅選秀真人騷《Good Night Show 全民造星》非常成功,打造咗組合MIRROR和ERROR,當中MIRROR成員人氣王「姜B」姜濤最受注目,去到邊都有大量支持者。嚟緊下星期一播出嘅《全民造星2》大家又睇吓邊位最有機會彈出?

吳啟洋(Phoebus)

14號吳啟洋(Phoebus)有「翻版金秀賢」嘅稱號,而且幕前經驗豐富,除咗參加過Ustar大專校草選舉之外,亦都係唔少商品嘅代言人,就連上屆冠軍姜濤都視佢為熱門人選。

黃浚銘(Boris)

18號黃浚銘(Boris)就帶點韓風味道,20歲唔夠嘅佢已經係知名嘅YouTuber,擁有二十萬fans!就算IG亦有13萬個followers!論人氣已經行先一步。

姜卓文(細John)

62號姜卓文(細John)嘅父親就係姜大衛,唔知會唔會又畀返幾分薄面呢?細John就係上年先畢業於薩凡納藝術設計大學,身形高挑青靚白淨,家族遺傳不可少!喺社交平台經常自彈自唱嘅細John上到台又得唔得呢?

胡學軒(Alfred)

41號胡學軒(Alfred)嘅文弱書生feel,反而係眾多猛男當中容易成為焦點!唱歌技巧亦相當唔錯,標籤佢為實力派歌手不足為過!

梁德忠(Tank)

29號梁德忠(Tank)原先就係上年《全民造星》嘅熱門,但就因為工作關係而退選。今年再接再厲參加《全民造星2》至少贏咗經驗先啦!

㓋助昇(Aiden)

64號㓋助昇(Aiden)擁有高大嘅身形,又略帶一點壞孩子個性!而且佢已經係太陽娛樂旗下嘅演員,後勤支援充足得多。

陳卓文

陳卓文一見到佢個造型係咪好熟面口呢?本身係一位自由身演員嘅陳卓文同姜濤一樣都係99號,加上佢仲同上年嘅姜濤服裝一模一樣!不過點都好,原先冇乜話題嘅佢至少都有一個talking point啊!

邱凱雄(Hugo)

82號邱凱雄(Hugo)外型就輸蝕咗少少,尤其是現今瘦就是美嘅標準!不過《全民造星》上一次得第四名嘅梁業都係肥仔一名,而家仲做埋Error嘅隊長,成功出道。Hugo唱功不俗,絕對有做黑馬嘅本錢。