內地拍日本奇幻名作《陰陽師》會唔會睇到妖妖聲?

日本小說家夢枕獏著名奇幻小說《陰陽師》即將搬上大銀幕,仲會一拍就拍兩集,分別為《晴雅集》及《瀧夜曲》。《陰陽師》變真人版無咩咁特別,小說喺日本早早被改編成同名漫畫,喺2001年同一年被拍成電視劇及電影,由瀧田洋二郎執導,野村萬齋、伊藤英明主演。到2015年又再拍多次電視劇,仲搵嚟堂本光一主演!

會特別攞出嚟講,係因為今次真人版電影將會由內地作家、編劇及導演郭敬明主理。佢以奇幻小說起家,文字功力有返咁上下,但近年佢最成功應該算係改編自己嘅小說《小時代》,搵嚟大批中台人氣演員楊冪、郭采潔、柯震東等拍成咗4部電影:《小時代》、《小時代:青木時代》、《小時代:刺金時代》及《小時代:靈魂盡頭》。

電影被評為「拜金」、「唯美」、「有包裝無內容」等,劣評得嚟偏偏年輕觀眾好受落,票房成績亮眼之餘,幾位演員因為參與《小時代》而爆紅,所以郭敬明可以用更多資金拍多套更劣評嘅奇幻動畫電影《爵跡》。我覺得最奇幻係有更多內地已經人氣火爆嘅鮮肉、女神參與,果然內地電影圈生態獨特,話題比電影質素緊要!

郭敬明電影一向做到「唯美」,近日發佈《陰陽師》海報亦唔例外,風格偏向日本風,好有漫畫feel,搵嚟趙又廷飾演陰陽師晴明、憑《香蜜綿綿燼如灰》人氣爆燈嘅鄧倫飾演晴明好友博雅、《踏血尋梅》獲得香港電影金像獎最佳女主角嘅春夏飾演瀧夜。

小說《陰陽師》故事設於平安時代,講述一個人鬼共處嘅世界,所以先有陰陽師呢個職業。去到內地照道理唔拍得鬼片,所以會變哂妖怪,背景又一定喺中國,左減右減後保留到幾多小說精粹定變成另一堆《三生三世》電視劇就要以後先知啦。不過點改都無所謂,因為根據內地邏輯,日本啲鬼怪故事源自中國,變返中國妖怪先係合情合理!

內地依家審查嚴謹,又限古令又限韓令,可以拍戲嘅題材少之又少,加上一向熱愛買版權改編而唔拍原著故事,IP買少見少,所以一樣嘅題材都唔怕撞照拍。除咗郭敬明版本,同一時間仲有套改編自手機遊戲《陰陽師》,由陳坤主演嘅《侍神令》,2020年都幾多妖魔鬼怪排住上映!