兒童不宜嘅兒童片 小學雞為初吻拎成人玩具做世界!

荷里活向來有大量以青少年生活為題材嘅電影,由1970年代經典《油脂》,到90尾千禧頭嘅《美國處男》(American Pie),近期啲嘅有《反啪啪同盟》(Blockers),條金科玉律主要圍繞高中畢業、勢要破處而發生一大堆烏龍百出嘅事,再包多個朋友可貴、成長必經之路等訊息。

雖然類似電影好多,不過唔止點解香港上得唔算多。Emma Stone未做影后之時都拍過唔少,戲中mean精上身、扮放蕩隨便其實純情過水嘅舊作《Easy A》,香港冇上正場。又或者08年嘅《弊傢伙。玩大咗》(Super Bad),講述3個宅仔為咗破處不惜一切嘅故事,捧起咗當時仲係新人嘅Seth Rogen同Jonah Hilll。

今次Seth Rogen做監制再玩大啲,新片Good Boys唔玩高中生轉玩小學雞,由《抖室》(Room)、《奇蹟男孩》(Wonder)男童星Jacob Tremblay,夥拍另外2個小學雞男童星,包括劇集《Goldbergs》嘅Keith L. Williams及曾參演《Boardwalk Empire》嘅Brady Noon,齊齊大玩有味笑話,仲瘋狂爆粗!

故事唔複雜,3個細路由幼稚園一齊玩到大(其實都係講緊6年班),去邊都3人行,同「有型」、「受歡迎」等毫無關係。一日Max(Jacob Tremblay 飾)竟然得到型仔同學嘅派對邀請,仲講到明去party有機會同女同學嘴咀!

3個傻豬仔為咗偷師學嘴咀,結果搞出個大頭佛;偷睇隔離屋姐姐打茄輪,結果偷咗大包丸仔;真人偷師唔成諗住上咸網睇,點知個「咸」字都唔識寫!

最癲莫過於偷咗父母堆性玩具以為係武器,1人1支「大炮」攞住周街fing!搞咁多嘢,都係為咗嘴女,喺party威返次!

雖然以3個小學雞做主角,不過有味笑話尺度寬廣絕不留手,全片充滿密集但辭彙有限嘅粗口。最頂癮係3個男主角拍攝時做盡各種兒童不宜,老母睇到會心臟病發嘅蠢事,點解會幫佢地接套咁嘅戲呢?

不過怕且佢地無份入場睇製成品,因為套片兒童不宜!