《光豬舞壯士》搬上舞台 觀眾有得塞錢「打賞」爆肌男

各位女士們仲記得2012年睇《光豬舞壯士》(Magic Mike)時嘅興奮嗎?當時嘅你有份喺戲院入面叫埋一份嗎?

電影以脫衣舞男Magic Mike(Channing Tatum飾)為主角,佢係脫舞衣會所嘅王牌,仲係老細(Matthew McConaughey飾)嘅心頭好同搖錢樹。跳左好耐嘅Magic Mike開始思考自己嘅人生,於是開設自家設計品牌,但老細唔想無左棵搖錢樹梗係極力挽留,同時間培養定另一個王牌Adam(Alex Pettyfer飾)接手。

男主角Channing Tatum本身都做過脫衣舞男,套戲有少少半自傳意味,本意係講多啲舞男生涯嘅辛酸。不過,由於電影入面所有舞男都樣靚身材正嘅關係,觀眾應該只係睇到連場脫衣舞同佢地副body有幾正,恨不得套戲有4DX或者有VR版本,最好可以摸到!女士們而家有福啦,依家你只需要買張機票去倫敦,就可以睇到摸到《Magic Mike Live》!

《光豬舞壯士》正式搬上舞台,今個星期於倫敦開演,《Magic Mike Live》由電影版男主角Channing Tatum導演,仲加入左唔少佢自身經歷。音樂劇版本比電影更似Channning自傳,佢仲好俾力咁去左倫敦做宣傳,但你唔會喺舞台上面見到佢!嗱,無左Channing Tatum都仲有好多猛男,睇宣傳照班演員,個個body同樣貌都非常有吸引力!

音樂劇《Magic Mike Live》仲好照顧觀眾,為左令大家有置身真正脫衣俱樂部嘅感覺,開場前仲會派定假銀紙俾觀眾,方便猛男演員喺面前跳舞時,可以攝錢入佢地條褲邊!如果擔心心臟負荷唔嚟,仲可以叫聲「unicorn」,咁演員就唔會係你面前跳!呢種互動程度點都精彩過玩VR啩?

仲等,買機票啦!