先甜後苦活受罪 龔嘉欣漏夜送外賣冧羅天宇

東方日報
龔嘉欣攞住成袋外賣冧羅天宇,兩個Sweet互望!

藝人羅天宇、龔嘉欣和尹詩沛日前為無綫新劇《香港愛情故事》開工。拍攝當日,天宇分別要「冧食」劇中老婆龔嘉欣的愛心外賣,以及被火爆上司尹詩沛喪鬧,先甜後苦的滋味並不好受!

新劇中,羅天宇及龔嘉欣演一對恩愛夫妻,當日拍攝的劇情是老婆因心痛老公開OT,故漏夜送上愛心外賣,兼施展冧功,令到天宇甜入心。不過,嘉欣鍾情目標其實是手中的道具外賣,直言是她的至愛:「因為外賣係魚蛋、燒賣、碗仔翅,呢啲係我平時最鍾意食,我可以當正餐都得,所以我食晒啲道具外賣!」

慘被尹詩沛喪鬧

Sweet過後,天宇則要受苦,演他上司的尹詩沛當晚猶如「殺人狂」般鬧人。天宇事後接受訪問時亦坦言是活受罪,但亦讚對方鬧得好:「佢鬧得好狠o架!咁咪好囉,可以帶動大家都投入角色!」但詩沛卻戥天宇慘,覺得自己鬧得太狠,對方猶如一位柔弱書生,因而有點不好意思。

向有無綫「御用妓女」之稱的詩沛,今次有機會轉型做「辣辣上司」可謂過足戲癮,她說:「我入行都有10年,之前真係演好多妓女角色,今次轉型喺造型上都花好多心思,重點係個化妝,嗰條眉真係好惡!」

尹詩沛狂鬧羅天宇,都有啲唔好意思!