傳菊梓喬暗撻張景淳 睇完戲去埋男家過夜

現年36歲喺神劇《天與地》中飾演家明嘅張景淳,出道多年都冇咩作品,只係間唔中喺《都市閒情》見到佢,近期令人有印象嘅就數到喺《使徒行者2》中飾演飛機哥一角。不過事業失意、愛情得意,佢嘅戀情就精彩得多,最近佢又有新嘅緋聞對象啦!

有報導指張景淳上年5月同華姐女友宋雙佳感情出現問題,未正式分手嘅佢就同張惠雅(Regen)拍劇而撻着,而Regan本身又有男朋友,搞到啲關係好複雜。雖然有記者影到張景淳氹宋雙佳,可惜最後都係分手收場。

事隔一排,有記者發現張景淳又有新戀情,記者影到佢同31歲星夢力捧歌手菊梓喬(Hana)去又一城睇戲。雖然二人保持距離分開行,但係就一支水兩份飲。之後Hana 亦上咗張景淳架車,去張景淳屋企過夜。

由於吳若希上年專心湊B而暫別樂壇嘅關係,Hana就得到公司力捧唱咗一系列嘅劇集歌,非常得寵兼人氣急升, 仲喺 《2017年度勁歌金曲頒獎典禮》  獲得3個半獎成為女歌手大贏家 ,而張景淳工作量近排先多返少少,加入處境劇《愛.回家之開心速遞》飾演反派龔燁,咁突然傳出緋聞,唔知公司會唔會捧打鴛鴦呢?