傳受網民狙擊 無綫藝人中秋節晚會活動宣佈取消

傳網民狙擊今晚無綫藝人中秋節晚會 兩活動宣佈取消

今日就係中秋節喇,唔少地區都有舉行慶祝活動,不過原定有無綫藝人出席嘅沙田及油塘活動就已經宣佈取消。

《逃犯條例》修訂引起嘅風波持續超過3個月,唔少網民都認為無綫嘅新聞報道偏頗,喺網上發起抵制行動,除咗干擾無綫記者採訪之外,佢哋揚言要抵制喺無綫落廣告嘅商品之外,同埋集體狙擊無綫嘅商場騷。好似早前無綫諗住舉行一個幫考生打氣嘅活動,先喺活動舉行前一晚突然取消,甚至連旗下藝人馬國明喺7月中去咗紅磡出席活動,期間約有200位網民到場高舉標語及大叫口號。

其實至今無綫都冇再舉辦過商場活動,甚至連今屆嘅《香港小姐競選》都冇設公眾觀眾席。不過喺前日有網民喺網上話無綫高層認為示威者得3分鐘熱度,反TVB嘅浪潮已經過去,所以佢哋諗住試水溫。如果今次活動冇人反對嘅話,佢哋就會開始瘋狂接job賺錢。有網民就呼籲「狙擊」原定今晚沙田舉行嘅「慶祝中華人民共和國成立七十周年-月滿歡樂聚沙田中秋晚會2019」。

由沙田民政事務處主辦嘅中秋晚會,原本計劃有安德尊、胡鴻鈞、菊梓喬(Hana)及何雁詩等無綫藝人出席,不過網民呼籲「狙擊」嘅消息喺網上瘋傳之後,沙田呢個活動基於公眾安全理由,已經宣佈取消。之後網民再呼籲大家去油塘出席另一個無綫嘅活動,因為呢個活動原定有3名無綫藝人參與,不過喺噚日黃昏嘅時候,商場就喺社交網站宣布因節目調動關係,活動將會取消。

商場宣布活動取消