催蕭正楠黃翠如造人!曹永廉:都係幾秒啫

催蕭正楠黃翠如造人!曹永廉:都係幾秒啫

藝人蕭正楠與曹永廉為無綫新劇《愛美麗狂想曲》開工,阿廉透露待劇集日內煞科便放假休息,在旁的阿蕭即串爆他:「冇嘢撈就冇嘢撈啦,放假!」令阿廉不懂招架,笑指稍後會進行身體檢查:「呢排拍劇成日對住阿蕭,硬係覺得心臟唔係幾妥。(帶埋阿蕭去驗?)今次唔會啦!」阿蕭即爆料說:「佢去驗大腸,唔使喇!」而阿蕭被問到會否趁機與太太黃翠如造人?他表示太太也忙於為新劇開工,故應未能配合,阿廉則入位指阿蕭要睇醫生:「其實造人都係幾秒啫,趁後生快啲,你都40幾歲人啦!」

對於黃翠如與拍檔洪永城的節目即將播出,阿蕭笑指會捧太太場,順便𥄫實對方可有蝦太太,問到會否效法二人拍攝相識10周年的節目?阿廉聞言秒回:「過到先算啦!哈哈!」