傅穎探心聲接「私生子」解寂

東方日報
「緊張媽媽」傅穎心掛掛,搵動物傳心師同愛貓傾偈。

貓癡傅穎受疫情影響,與愛貓「瓜瓜」分隔兩地,忍不住去主題Cafe抱抱貓咪搵愛的替身,又請動物傳心師傳遞心聲。她期盼疫情早日完結,然後就辦手續接貓咪回港居住!

近年以北京為發展地的傅穎,前年在當地飼養了一隻貓咪「瓜瓜」,早前她回港過年,其後受疫情影響未能北上,令她心掛掛:「超掛住佢,本來打算過完年返上去,佢4月就3歲大,之前兩年因為拍戲都冇同佢慶祝,仲諗住今年可以,但睇依家情況應該好難,估計可能要過多幾個月先返到北京。」為解相思之苦,她每周都透過視像通話與愛貓見面。

貪靚貓自信爆燈

傅穎每次離開北京拍戲,都將愛貓交托寄養人,她又托朋友找來動物傳心師跟「瓜瓜」傾偈:「我咁耐冇出現,擔心佢唔記得咗我,會以為我唔要佢。」動物傳心師代「瓜瓜」回話:「喺電話有冇見到媽媽?我又唔蠢,不過見到好似見唔到,因為聞唔到佢。我有驚過媽媽唔要我,因為好耐冇見佢,但依家知媽咪冇話唔要我,仲好愛我,所以好開心。」「瓜瓜」更自信長得漂亮,人人見到牠都會喜歡,傅穎聽到笑說:「太似瓜瓜會講嘅嘢,因為佢好細個嗰陣嚟到我屋企,已經成日照鏡,坐喺塊鏡面前望住自己,感覺真係好搞笑!」

遙距指揮搬屋

視愛貓如兒子的傅穎變了緊張媽媽,聽到動物傳心師代「瓜瓜」說出:「吓!要走,又要等!」即時心噏,她知道愛貓已等候多時,雖然寄養家庭有很多貓咪,但明白牠覺得苦悶,因為牠愛黐人多過黐貓。

另外,傳穎北京寓所早前租約期滿,但因為不能北上,只能遙距指揮將衣物及電器等送返港。她亦打算申請愛貓來香港居住,但要待寵物運輸復工後才能辦手續。

搵愛的替身,拎住逗貓棒唔放。
傅穎回港後未有北上,與「瓜瓜」分隔兩地。