偶像變男友 馬明 黃心穎慶祝情人節

orientalsunday.hk

被視為無綫超級筍盤的 馬國明 ,11年跟胡定欣分手後一直未有新戀情,馬明出名乖仔兼零負面新聞,不過只苦候契妹唐詩詠身邊隨時候命,加上天然呆後知後覺、為人怕醜、唔夠主動,着實錯過唔少姻緣。直至馬明被熱情主動、港姐出身的黃心穎融化,心穎一直視馬明為偶像,主動出擊成功撻着,早前更被本刊獨家斷正拍拖預祝情人節,到銅鑼灣撐枱腳兩粒鐘豪擦貴價日本菜,馬明當日潮着卡通tee側戴板仔帽,瞬間變young,為襯細自己十五年的心穎BB,花盡心思﹗

撰文:東方新地

 

入行後兩段情

馬明入行多年,兩段情都是與圈中人發展。06年馬明被爆與曾華倩發展姊弟戀,兩人被影到拍拖勝地鯉景灣撐枱腳,更被發現曾華倩開車載馬明返香閨過夜,但兩人都死口不認戀情;後來馬明與合作《舞動奇跡2》的胡定欣撻着,但有指女方嫌棄馬明為人老土、悶餅,馬明亦透露曾因冇梳頭、唔打扮、不修篇幅而激嬲定欣,拍拖三年後分手。

年紀唔輕加上阿媽已經多次催婚,所以馬明早前在胞姊的介紹下,到尖東做義工順道識女仔!期間馬明除剩背心晒肌,將多個紙皮箱逐一搬上車,風度盡顯。另外又跟一名長髮女義工傾談,不時講笑以免有冷場,對天生天然呆的馬明,已經躍進一大步!

第一次獻馬明

不過超級筍盤又點會冇女埋身,仲要係索爆女神心穎BB!心穎12年選港姐奪亞軍,早早揚言馬明是其超級偶像,希望有朝一日可以跟男神合作。其後於劇集《on call 36小時II》和偶像合作,雖然只係客串,但令心穎開心到瞓唔着。而去年《為食神探》中心穎以小背心谷胸上陣,盡騷激凸身材之餘,又賣大包與馬明零距離身貼身,於是男神都被電到暈得一陣陣!

拍拖豪歎日本菜

2月13日係馬明生日,又係兩人過的第一個情人節,當然要抽時間慶祝!當日馬明接心穎放工到銅鑼灣,雖然未有親密舉動,但熱戀中的情侶話題綿綿不絕,邊行邊傾,漫步到開平道的高級食肆立林的Cubus大廈,直上十一樓的壽司店。該店賣點是全日本師傅、日本運送貴價當造食材,人頭二千蚊起計算,平時知慳識儉的馬明慳自己、豪心穎!

平日打扮隨意甚至近乎求其的馬明,呢晚明顯悉心打扮過,頭戴cap帽、iron man卡通tee配老牛,刻意潮扮青春;反而戴上眼鏡、配上披肩的心穎比平時成熟,15年距離立即拉近!

雙雙返香閨

歎足兩粒幾鐘,兩人遇見本刊記者時齊齊對住鏡頭傻笑,本刊記者問二人是否慶祝情人節?是否拍拖?一齊幾耐?見家長未?等問題,一臉老尷的馬明只一味無限loop「朋友食餐飯啫」,反而在旁的心穎表現淡定,笑住回應:「係呀﹗朋友約食飯﹗」之後兩人去停車場取車,心穎熟悉地逕自走去開車門上車,等馬明送回香閨。

對於和馬明撐枱腳,心穎回應本刊時表示當晚大家有傾有講,成餐飯食得好開心!而兩人就正在互相了解當中。另外心穎又話自己一向鍾情成熟型男仔,而且大讚馬明孝順。似乎仲係好回味喎!

全文完

延伸閱讀:

《有樓萬事足》港女Seasun爆拜金金句:無樓唔好白撞

TVB童星打入K-POP 莊錠欣成泫雅師妹