倪晨曦下月結婚未識緊張

東方日報
倪晨曦拍飲食節目,竟然「食極唔肥」。

倪晨曦(Elva)、鄺芷凡昨日出席香港開電視節目《五星級絲打》記者會,她們透露節目要到很多地方發掘吃喝玩樂的潮流資訊,有次要到元朗大棠附近拍攝,Elva笑言幸好不用自己揸車:「我啱啱考到車牌,仲未喺路上揸過,如果要我揸我應該會喊,因為香港太多車,車速又快,我練車時啲車喺後面係咁閃我,搞到我好驚。」

下月結婚的她表示婚禮已籌備得七七八八,心情未見緊張:「仲好放鬆,Enjoy工作,可能就到先會緊張。」節目經常食很多美食,她笑言沒有增磅,因為有做運動:「聽朋友講結婚當日全日冇食過嘢,要凌晨先有嘢食,我唔知頂唔頂得住,可能到時叫經理人煮嘢畀我食。」

鄺芷凡介紹各位「絲打」食好西。