「借筆風波」越鬧越大 重溫楊明莊思明是非事件簿

莊思明&楊明

楊明與女友莊思明(Lisa)感情穩定,經常出雙入對及不時喺社交網站放閃,真係羨煞旁人。不過近期佢哋有唔少嘅是非纏身,而家就同大家數一數!

莊思明不滿空姐態度 公開機組人員名單

身為「拿督女」嘅莊思明當日乘坐經濟客位,Lisa喺填入境表時發現冇帶筆,就分別撳服務燈3次想向空姐借筆,點知一直冇人理佢,其後發現被一名空姐滅燈無視。Lisa前日喺社交網站以千字文投訴及公開一張疑似當日航班嘅機組人員名單,要求航空公司可以積極處理問題。唔少網民批評佢嘅做法,認為有如透露別人私隱,最後佢將相片刪除。該航空公司嘅空服工會亦發聲明,指佢涉嫌觸犯私隱條例。

莊思明

楊明燉湯店元旦被破壞

楊明開設燉湯店嘅分店喺元旦被「裝修」。事件發生後,楊明與友人嘅私下微信對話流出,佢喺對話中聲稱做乞丐都絕不妥協。另外,佢亦喺微博貼上載舖頭排長龍嘅相片,留言感激廣大市民嘅支持同鼓勵,最後叫大家同警察加油。

楊明莊思明低調到警總送暖照片被公開

喺上月,一班藝人低調到警總為警察打氣,拎住撐警banner與警務人員合照,當中包括楊明及莊思明。撐警大合照被公開及喺網上瘋傳,掀起唔少網民熱烈討論。

楊明:「身為中國人,愛國是一定的,不用多說。」

楊明嘅燉湯店(灣仔分店)喺10月於門外貼上標語,引來好多內地網民力撐。有內地網民留言︰「楊明是愛國愛港撐警察,但是現在香港現在的情況,店員為了自身的安全,蟑螂又搞亂店,現在香港基本無政府狀態!強烈建議,楊明到內地可以開分店!」當然有人好快留言覺得愛國愛港係冇咁重要,撐警先重要。楊明就立刻回覆︰「身為中國人,愛國是一定的,不用多說。」

楊明桃花不斷及被前女友悔婚

楊明自出道以來感情都十分豐富,除咗已公開嘅女友之外,佢嘅緋聞女友亦有唔少。公開戀情嘅對象包括陳敏之、阮兒及圈外女友Joanna。楊明喺2013年宣布與圈外女友Joanna拉埋天窗,不過可惜最後婚事告吹。楊明與莊思明喺2016年拍攝《愛‧回家》期間撻着,佢哋認愛後愛得高調,不過期間楊明都有與龔嘉欣及郭千瑜傳緋聞,現時修心養性儲錢結婚。

楊明醉駕刑毀

楊明分別喺2005年因醉酒駕駛及2007年因刑事毀壞而犯官非,形象插水。事件對佢嘅事業大受影響,更即時被無綫雪藏。一度投閒置散嘅佢,事業從頭起步,由冇對白嘅角色慢慢做起,去到《愛‧回家》、《收規華》、《兄弟》及擔正做男一嘅《婚姻合伙人》等。不過講到佢嘅代表作,一定係上年嘅《鐵探》,劇中飾演重要角色邱勵傑(Matt Sir),戲份絕對唔少過其他男主角,戲份大大提升,角色備受矚目。

《鐵探》劇照