倉底劇排隊出街 《三個女人一個「因」》《波士早晨》有得睇

唔係睇開無綫嘅都知道,電視劇集放喺週末播放,九成收視都唔會好得去邊。好似早前嘅《踩過界》,有口碑不過收視麻麻;而近排播放嘅《雜警奇兵》同《性在有情》就連話題性都冇埋,收視更加係強差人意。不過無綫一於冇有怕,明年繼續將劇集放係週末播放。

有報導指《性在有情》播完後,下年2月18日將會播放由黃智雯及袁偉豪主演嘅《三個女人一個「因」》,劇中講述黃智雯有多重人格,會分裂為飛機師、大律師及宅女。其實套劇2016年已經拍好,不過今年因為《蘭花刼》及《燦爛的外母》兩度被抽起。雖然劇集喺「炮灰檔」上映,不過至少可以重見天日啦!

而另一套有傳於「炮灰檔」上映嘅劇集,就係2015年已經拍完嘅《波士早晨》。演員陣容一啲都唔弱,有久未拍劇嘅陳慧珊同李子雄,加埋黃智賢、洪永城及李佳芯等等,而監製就係已經離巢嘅關永忠。

劇集以辦公室政治為題材,黃智賢飾演衰格波士,陳慧珊演全能秘書,同黃智賢有感情戲。塵封3年嘅《波士早晨》安排喺2月中一至五出街,唔使等足10年已經好好啦!

消息傳出後,唔少網民都戥黃智雯唔抵,認為佢演技唔差,但係近年拍嘅4套劇,已經有2套喺周末「炮灰檔」播出。