【係愛呀Do姐】俾陸永捉住隻手 Do姐:請你唔好乘機掂我

前年《Do姐去Shopping》遊遍英國、法國及澳洲等地,節目中農夫經常挖苦Do姐,大玩爛Gag,帶來唔少話題,大受觀眾歡迎。事隔兩年Do姐再拉大隊拍攝《Do姐再Shopping》率領農夫,分別同三位嘉賓去Shopping,首先同黃翠如去日本,再同馬國明去丹麥,最後再同蕭正楠去意大利。

頭兩集Do姐、農夫同黃翠如呢個組合已經玩轉東京,又玩街頭高卡車、攀石、連瑜伽拱橋都做埋,真係好好笑。

今日Do姐喺IG上載節目相,Do姐佢地去咗北海道夕張參加蜜瓜拍賣會,相中各人神情緊張,陸永仲好似緊張到捉住Do姐隻手。Do姐留言話:「緊張還緊張,陸永,請你唔好乘機掂我!」

雖然一班心水清網民知道係角度問題,不過都即刻留言話陸永:「好大膽!」、「係愛呀do姐」、「呢個錯角好正」、「放開Do姐隻手!」、仲話陸永成日借啲意抽Do姐水。

除咗陸永之外,喺翠如BB IG相片中都有C君意圖捉住Do姐嘅相。