余香凝重返校園孤寒儲學費

東方日報
咪睇Jennifer成手文具用品,其實全部計過度過先買!

影壇新星余香凝在娛樂圈發展順利,今年更一度有機會問鼎金像影后。話雖如此,她仍努力自我增值,早前決意重返校園,希望考取大學學位!由於學費負擔不輕,她每日過着「食湯渣」的慳家生活,不過這位「清貧學生」慳己唔慳人,對身邊愛錫的人仍大破慳囊,送禮絕不手軟!

余香凝(Jennifer)入行後事業發展不俗,今年更一口氣獲3項金像獎提名,當中包括「最佳女主角」獎項,獲認定為影壇後起之秀。Jennifer卻有感自己「知識貧乏」,早前決定報讀大學的社會及心理學課程。由於4年學位課程學費逾10萬,身為慳妹的她立志做清貧學生。

據悉,26歲的Jennifer本身家庭負擔不算太大,但鑑於想30歲前完成置業大計,讓家人有個安樂窩,所以早於報讀公開大學相關課程前,她已知慳識儉,日用100元簡直易如反掌。平日她絕不介意以公共交通工具代步,最愛食住家飯,湯渣當佳餚醫肚亦冇問題,更曾向友人打趣說:「唔夠飽可以食多啲菜,又可以減磅,一舉兩得!」

為契女破慳囊

9月中已開學的她,起初亦需時適應校園生活,幸而她報讀的課程較為彈性,且容許學生直接打電話問功課,令這位兼讀生放下心頭大石。日前,她出席公開活動後,被發現換衫「喬裝」到附近的大型連鎖生活店大破慳囊,學業心重的她甫抵埗即集中火力研究文具,對筆類更情有獨鍾,最終揀了十多支筆、文件夾及筆記簿等上課必需品去結帳,但因她專揀平價文具,所以只花費約百多元。她之後發現該店有童裝部,即掉頭左挑右選,對得意童裝愛不釋手,覓得心頭好後再次步向收銀處,雖然幾件衫仔要花費數百元,Jennifer卻豪爽付款。

讚同學仔友善

記者事後聯絡上Jennifer,問到「揼本」買童裝?她笑說:「唔好誤會,係買畀契女嘅,貴啲冇所謂。(貴過晒你全部文具喎!)慳自己唔慳人嘛!」問到與同學相處如何?她說:「本來以為好易識到新朋友,不過開學後發現課程好靠自己,校園生活其實唔算多,只係試過有日做完嘢返學冇落妝,有啲同學仔認得我囉!佢哋個個都好Nice。」

揀到烏晒身,金睛火眼物色平貨。
買文具就爽手,揀襪就睇完一輪都唔啱心水。
見到童裝,即大破慳囊。
余香凝演藝事業及學業兩兼顧。