余文樂正式封盤 娛樂圈仲有邊啲筍盤未結婚?

余文樂喺社交網站上載結婚相,正式公佈同拍拖一年多嘅台灣女模王棠云結婚,男神正式封盤。呢個消息簡直震驚中港台,一班「余太」們聽到後立即心碎。雖然余文樂結咗婚,但其實娛樂圈仲有唔少筍盤,佢地一日未結婚大家都仲有機會㗎。

馬國明

馬明有身高、有樓揸手、有學歷,入行多年都冇咩緋聞,加上為人老實又顧家,一副天然呆樣,閒時都係同friend踢吓波,仲會去做義工,絕對係無綫「鑽石筍盤」之一。不過隨住馬國明同黃心穎嘅戀情半公開,表示又一個城中筍盤可能被私有化。

陳展鵬

自從由亞視過檔無綫後,陳展鵬好快就被捧為一線小生,劇集一套接一套。拍劇同對手胡定欣傳過緋聞,但都無認過戀情。直至多次俾人拍到同緋聞女友單文柔拍拖,佢地嘅戀情終於慢慢地上化。

古天樂

片酬過千萬、坐擁6億身家、有錢、靚仔、又孝順嘅「娛樂圈極級筍盤」古天樂,唯一承認過黃釲瑩女友身份,二人2001年分手後,古仔幾乎0緋聞。一直寄情工作,直至最近有傳同郭采潔交往中,但佢無任何無回應。

呢個冇女友嘞,但係……埋到身未先?

謝霆鋒

37歲嘅謝霆鋒年前將自己嘅後期製作公司股權出售,套現超過1億,又擁有多個物業,保守估計身家有10億以上。近年愛上烹飪,除咗主持內地飲食真人騷《12道鋒味》之外,仲發展飲食品牌。不過姊妹們,你地嘅對手係王菲……

黃宗澤

外表高大靚仔嘅黃宗澤同胡杏兒分手後,異性緣好好嘅佢,有時都會同合作女星傳下緋聞, 不過就冇個係真命天女。呢幾年Bosco愛上儲樓,喺東南亞及內地有九間物業。除咗有樣有錢之外,Bosco喺圈中出名孝順,喺15年更加買咗個物業俾媽媽做母親節禮物。有財力又有孝心,筍盤一詞真係當之無愧。

林峯

林峯身為廈門首富之子,有樣有家底,仲要歌、影、視三線都發展得非常好,條件相當優秀。可惜五年前被吳千語mark實後,一直愛得痴纏,真係打風都打唔甩,可算係處於半封盤狀態。