余思霆阿Q精神:等朋友請食飯

東方日報
余思霆(圖)與劉穎鏇在港未住滿7年,派糖都冇份受惠。

由外國來港參加選美的余思霆及劉穎鏇,因在港未住滿7年,政府昨日「派糖」,香港永久性居民獲派一萬元,但她倆卻見財化水。劉穎鏇大呼「好唔開心」,余思霆指朋友會輪流請食飯「安慰」她!

台灣出世的余思霆,13歲隨家人移民紐約,2017年來港參加國際中華小姐競選奪冠入行,來港發展僅3年,政府今次派錢她無緣享用,樂天的她笑言沒有不開心,阿Q精神地說:「唔會覺得唔抵嘅,不過我啲朋友應該有唔少攞到嘅,相信佢哋會輪流請我食飯。(叫男友朱敏瀚請食大餐?)咁又唔使,平時食飯就夠喇!」

與思霆「同是天涯淪落人」的2016年港姐亞軍劉穎鏇,從美國來港選美,同樣在港未住滿7年,「見財化水」大感不快:「冇得攞好唔開心,不過,今次財政預算案都幫到弱小社群,大家都會用多咗錢去買防疫用品,有呢筆錢可以解困,幫助到啲低收入家庭。雖然我冇份攞一萬蚊,但有薪俸稅優惠,都受惠到嘅。」

林泳淘有骨 阿蘇寸爆

對於財政預算案,藝人反應各異,林泳淘說:「政府好好啊,雖然佢由始至終都冇聽市民嘅意見,唔封關、唔幫醫護、撲唔到口罩,但派呢一萬蚊真係能解市民之急,對有需要嘅低收入人士嚟講係好事,只係大家可能會更希望政府能夠用心將正確嘅事正確地做,因為市民嘅心唔係單靠錢維繫嘅。」至於65歲的蘇施黃就擔心有生之年都未攞到錢,並發文暗寸港府:「大家夠18歲未?係咪有香港身份證?希望大家在有生之年,香港政府會派到一萬蚊到你手上。」阿蘇有此憂慮,因去年政府的關愛共享計劃,派4,000元給合資格申請者,至今都未派完。而育有4名子女的林盛斌就有感而發說:「如果係滿18個月都有得拎就爽皮嘞!」

劉穎鏇
林泳淘指政府派一萬蚊,對低收入人士係好事。