余思霆抽中百萬大獎交租清袋

東方日報
余思霆當年中大獎超興奮!

前華姐余思霆於2017年台慶抽到100萬獎金獎品,當中包括30萬簽帳額及10萬現金獎,問到當時如何分配大獎?她說:「嗰陣大部分嘅錢都係用嚟交租,畀咗10幾萬,其他就用嚟買機票返紐約同台灣,期間我搬咗幾次屋,所以啲錢用得七七八八,剩咗就用嚟買咗幾對波鞋。」問到是否想再中大獎?她即興奮說:「梗係想啦!下年我會努力!」

此外,昨日她為無綫節目《善心滿東華2019》項目「單車疊羅漢」進行排練,大呻難度高:「最難係一個人踩單輪,So far得兩個人OK。我想征服佢,仲有幾日時間,不過隻腳瘀晒!」問到識溜冰,是否有幫助?她說:「都有,平衡力會好啲。」

她又透露早前返台探親:「祖父母依家日日要去醫院,所以有時間就返去幾日,陪吓佢哋。(男友朱敏瀚有冇一齊去?)冇呀,佢要做嘢。(媽咪有冇催婚?)唔會,佢叫我哋做好朋友先,又話如果嫁唔出,佢會養我,可能係因為我細個爹哋、媽咪離婚,佢唔想我同佢一樣。」至於同場的楊盼盼擔任嘉賓指導,大讚一班生力軍充滿動力。

一班生力軍預演「單車疊羅漢」。