余德丞怨蔡思貝冇心肝

東方日報
余德丞未有蔡思貝作伴,翹實陳煒開心合照。

無綫男神余德丞前晚暗寸緋聞女友蔡思貝「冇心肝」,早前相約睇演唱會「險被跣」、請食生日飯又遲足兩個月!明知他不喜歡芝士,都點芝士蛋糕,令他氣結!

余德丞、陳煒、薛家燕、汪明荃等,前晚假電視城錄影節目《娛樂大家》。9月初生日的余德丞,近日才獲蔡思貝主動邀約食生日飯,他無奈苦笑:「都過咗差唔多兩個月,呢餐飯終於食到嘞,嗰晚我哋去咗打邊爐,共用一爐兼冇用公筷,大家都冇病嘛。(佢買生日蛋糕畀你?)佢揀咗間高級餐廳,嗰度乜都有,不過佢叫咗芝士蛋榚,我最憎芝士,佢咪自己食囉!」

他又大爆思貝不時「放飛機」:「好似之前約咗睇演唱會,佢話嚟又唔嚟,最終突然出現。我喺現場同記者講自己單拖,幾驚畀人話講大話!」談到日前客串演出《使徒行者3》,他透露扮演主角馬國明的年輕版,兼有機會揸真槍,搞到戲癮大發。

陳煒身痕要撈

至於陳煒笑言近日比較清閒,已半年冇拍劇,只忙於出埠登台唱歌:「有戲癮o架!我諗都要去𢱑撈或敲門,坐得太耐會身痕。(忙拍拖,同男友感情大增?)OK啦。(出年雙春兼閏月,宜婚嫁喎。)十畫未有一撇啦,結婚唔係一個人話事,未被求婚。(抗拒再婚?)唔係,人有個伴好重要。」

而薛家燕表示稍後將到星馬拍廣告及領獎:「我哋呢啲年紀都係拎嗰啲獎(暗指老人獎)啦,我50幾歲時,外國有個頒獎禮想頒終身成就獎畀我,好似叫我退休咁,我推咗,結果大會轉咗個獎名再頒畀我。」問可會順道招婿?她指阿女大可異地戀,又說有為女兒介紹男仔約食飯,但阿女常說「唔得閒」。

薛家燕即使攞終身成就獎,仍未想退休。