余德丞問准粉絲畀蔡思貝「入門」

東方日報
蔡思貝與余德丞經常公開放閃,早已被外界視為一對。

現年30歲、憑陽光帥氣成為無綫男神的余德丞(Dickson),去年經歷生死後養精蓄銳,近日雄風再現,向粉絲展示超卓球技,更乘機「試水溫」,爆seed問粉絲:「如果我宣布同蔡思貝拍拖,你哋會唔會唔支持?」聞得粉絲批准「入門」,他即開心得愈講愈亂,口快快說:「我冇諗住宣布!」

去年8月踢波時暈倒昏迷、一度危殆要在深切治療部留醫的余德丞,幸好大步檻過,現已全面康復。早前他為《我和星星有個約會》相約3位女粉絲Cherie、Vanessa及陳小姐,到其母校香港華仁書院齊齊踢波。Dickson教練上身親自教路,示範帶波、扭波及射波等足球基本功,雄風再現,愈射愈勁,粉絲睇到嘩嘩聲,他說:「好開心有咁支持我嘅fans,開心實現咗佢哋嘅夢想,都係我嘅夢想,可以同fans一齊踢波。」

「你鍾意咪得」

難得和粉絲近距離接觸,Dickson話題多多,不但大談近況,同時盡顯親民作風,有問必答。當粉絲八卦偶像感情世界時,Dickson先問三女喜歡哪位緋聞女友,她們即回答是蔡思貝,笑言開綠燈批准女方「入門」,並說:「你鍾意咪得囉!」Dickson即笑到四萬咁口,更打蛇隨棍上,口快快問:「如果我宣布同佢拍拖,你哋會唔會唔支持我?」粉絲說:「唔會嘅,但會傷心少少。」他竟說:「唔緊要,我未宣布。」話音剛落,明顯知講錯嘢,他即急急補鑊:「唔係,我冇諗住宣布。」愈講愈亂!

唔係學校風頭躉

另外,Dickson分享了久違球場接近一年的感覺,坦言醫生忠告他不能做劇烈運動,故一直有心理陰影,不太敢做運動:「當身體感覺好番啲,所以就開始落番球場,由行路、緩步跑、場邊傳波、帶波,慢慢個人有番啲信心,可以踢番波。」身為「華仁仔」的他來到母校,做「導遊」帶粉絲參觀校園,包括球場、課室及花園等,分享當年的校園趣事。雖然踢波及游泳皆精,但他笑言當年不是學校風頭躉,皆因讀男校關係,又自爆當年在校內足球比賽中,從未贏過。

化妝:Chloe Yu

髮型:Angus Leung @ Hair Culture

<!--AD--><div class="footerAds clear">第一手消息請下載on.cc東網<a href="http://itunes.apple.com/hk/app/id349812998?mt=8" target="_top">iPhone/</a><a href="http://itunes.apple.com/hk/app/id387862928?mt=8" target="_top">iPad/</a><a href="http://market.android.com/details?id=com.news.on" target="_top">Android/</a></div><!--/AD-->

余德丞與陳小姐(左)、Vanessa(右)及Cherie「踢」成一片。
余德丞一落球場生猛晒,大腳抽射型爆!
在余德丞教導下,粉絲盤球似模似樣。
余德丞扮老師授課。