何雁詩姜麗文有偈傾唔提鄭俊弘

東方日報
何雁詩與姜麗文首度同場,大家笑一笑冇尷尬。

歌手何雁詩前晚與男友鄭俊弘的前度姜麗文一起為無綫節目錄影,兩人全程表現無芥蒂,還大方合照,何雁詩又指跟對方有傾偈,但當然會避開有關男友的話題啦!

何雁詩、姜麗文與黃祥興等前晚錄影無綫節目《娛樂大家》,鄭俊弘的「新歡舊愛」何雁詩與姜麗文首次同場,二人表現大方,坦言事前已知有記者在場,被要求影合照時,她們都表現得全無芥蒂!何雁詩被問到與姜麗文同場可感尷尬?她表示:「冇尷尬,大家同一間公司,始終都會見到。」她還指跟對方於化妝間有傾偈,記者遂問有冇傾到鄭俊弘的話題?她謂:「唔會特別傾,如果唔係就真係尷尬啦!(有冇同男友講會同場?)有,不過佢冇乜反應。」

姜麗文以一身「魔女Look」現身,以配合該集於萬聖節播放。談到與何雁詩同場,她笑說:「之前都知道會同場,冇所謂啦,最緊要大家開開心心、世界和平。我依家同柏豪(現任男友)好開心,我同佢(鄭俊弘)已經係舊聞。」又直言與鄭俊弘有聯絡:「都係傾吓我隻狗,同埋如果有時有新聞出會通知聲佢,大家冇Negative feelings,算係hi bye friend。」

黃祥興考慮絕育

黃祥興日前宣布太太懷上第三胎,他透露:「預產期係明年一月尾,我哋想趕生豬B。(開刀?)係,因為上兩胎都係。」談到BB性別,他說:「我哋冇乜所謂,呢次係最後一個嘞,本來冇諗住,但佢嚟到我哋梗係歡迎。(為免再有,你絕育?)可以考慮,如果唔麻煩同痛嘅話,而且聽講男性絕育,有需要嘅話可以解番開。」

鄭俊弘
黃祥興三度做老竇,趙希洛當然有恭喜佢啦!
眾人以萬聖節造型錄影,爭奇鬥艷。