何廣沛新劇造型與《熱血喪男》男主角激似 網民:抄襲定致敬?

何廣沛新劇造型與《熱血喪男》男主角似到十足十

近年無綫劇集成日都俾人話冇新意,題材嚟嚟去去都係爭產、警匪及醫療,直至《降魔的》及《金宵大廈》等加入一啲奇幻元素,先叫做有啲新意,成功喺網絡掀起話題。嚟緊無綫劇集有進一步突破,就係以喪屍為題材。

《食腦喪B》造型記者會

喺噚日,新劇《食腦喪B》舉行造型記者會,劇集搵嚟何廣沛、江嘉敏及陳曉華主演,三人合演一場人屍戀,諗住可以吸引一班後生仔收睇。為咗配合喪屍造型,何廣沛披頭散髮,戴上白色隱形眼鏡,佢嘅造型十足十荷里活男星尼古拉斯侯特(Nicholas Hoult),喺2013年嘅美國電影《熱血喪男》(Warm Bodies)中飾演嘅R。何廣沛表示角色以食腦為生,肚餓時先會變成咁嘅樣,不過呢個look未算最恐怖,之後會有更恐怖。

《食腦喪B》造型記者會

唔知套《食腦喪B》嘅劇情同《熱血喪男》似唔似呢?會唔會都係講喪屍愛上人類,重新有心跳,最後亦變返做人呢?!

《熱血喪男》劇照