何依婷傳被包愧對家人爆喊

東方日報
何依婷留學期間四處窮遊,卻因而傳「被包」。

現年26歲的何依婷,參選港姐期間飽受攻擊,被指「愛炫富」、「被包養」等,令她大受委屈,自責要家人承受壓力!事過境遷,她揚言若再遇流言攻擊定必反攻,不再受屈!

何依婷(Regina)2017年參選港姐贏得亞軍入行,去年加入人氣節目《學是學非》,又在劇集《機場特警》飾演野蠻女友一角,贏得不少讚賞!

事業發展順暢,Regina當然開心,但她亦曾匿在家中爆喊過日子,她說:「選港姐期間,由普通女仔變成要承受咁多輿論壓力嘅人,真係唔知點做,睇到惡意攻擊只識匿埋屋企喊,所以我好欣賞師姐麥明詩同馮盈盈,遇到冤屈事會喺社交網反駁,好勇敢!其實我當初都可以勇敢啲,被屈當然要澄清,唔應該只係匿埋喊!」

窮遊瞓碌架床

Regina覺得最冤枉是被指炫富:「話我成日去旅行!當年我攞到獎學金去英國讀書,只係周末搭火車去附近城市行吓,聖誕節去法國都係窮遊,跟同學每人夾百幾蚊租酒店瞓碌架床,話我炫富真係好委屈!更離譜係話我一個人去咁多地方係畀人包,我同成班同學去(口架),點解會傳到咁?我覺得好對唔住父母,連我90歲嘅爺爺都好唔開心,仲叫我唔好選,話養得起我。」

唔鍾意收禮物

Regina入行前在知名公司擔任金融服務顧問,收入豐厚,早前因駕名車而再被指炫富,她直言:「好好彩我有幾個節目喺手,同埋經理人幫我接到好多出面嘅工作,收入唔會比以前差,架車係我送畀自己嘅25歲生日禮物,我嘅工作全部講得出,有得計嘅。」

單身的她不乏裙下之臣,問有否瘋狂攻勢,天天送花?她說:「我唔喜歡收花,會謝o架嘛,好浪費,反而識音樂會加分。同埋我好怕人哋對我太好,如果做唔成情侶,會覺得負咗對方,所以追我真係唔需要對我特別好。(喜歡送禮嘅富二代咪冇優勢?)Sorry,真係冇得加分,哈哈!」