任達華晨操練腰力 被撩打友誼波

東方日報
任達華舉高腳拉筋,仲好柔軟喎!

去年7月於內地出席活動時遇襲受傷的影帝任達華,經過約半年休養後已漸漸痊愈,為應付「復出」後的拍攝工作,他近日被發現頻頻「晨操」,準備Work Hard!

任達華曾形容今次受傷換來的「假期」,是從影四十多年來最長的一次,期間推掉四、五部電影,雖然肉赤,但換來的「家庭溫暖」卻非筆墨能形容。不過,隨着身體康復,他的悠長假期亦要結束,據悉他已連接兩部電影,相信很快便投入開工。

為應付未來工作所需體力,任達華已經開始密密加操!日前早上,他由司機接載往跑馬地馬場附近公園,抵埗後見全副運動裝打扮的他一支公跳繩,又「貼地」做Sit Up,之後壓腿拉筋及跑步練氣,未幾已大汗疊細汗,故停低休息及飲水補充。期間有途人認出,他即禮貌微笑及講句「新年快樂」。身為「波牛」的他發現附近有人踢波,即趨前停步觀戰,有波友與他搭訕:「聽講你守龍門喎!得閒過嚟一齊玩啦!」他即唯唯諾諾。

逛女裝部 大出血

約一小時後,任達華更衣整裝,登上座駕前往金鐘Shopping。他首先進入一間時裝店,獲店員熱情招呼,只見他於女裝部左挑右選,其後又拿起男裝外套拼試,未幾即有斬獲,逗留約半小時後挽着大紙袋步出。離開時,他遇影迷要求合照,即停步滿足對方。

跳完繩做Sit Up,打造最Fit身形。
女裝部左揀右揀,最後買足一大袋。