【仲慘過扮棋】努力係有回報!阮政峰曾經扮《放學ICU》蔥蔥

無綫處境劇《愛·回家之開心速遞》中扮演池子孝嘅阮政峰同劇中飾演熊心如嘅蘇韻姿,因扮演情侶而深受大家歡迎。阮政峰8歲開始已經練功夫,太極拳、刀槍劍棍佢都學過,2011年參加《功夫新星》加入無綫,之後佢就加入了無綫第25期訓練班。

訓練班出嚟第一個工作,佢就成為《放學ICU》主持之一,仲同譚玉瑛姐姐、Lulu蓋世寶等等做拍檔。唔講唔知,原來佢同時亦都扮演《放學ICU》ICON「蔥蔥」。阮政峰表示當時監制覺得佢好活潑,又有武功底,同埋佢係全班之中最矮,所以揾佢試下做。

嗰時佢做《放學ICU》主持之餘又要做「蔥蔥」,令佢有更多演出機會及收入。佢話當時「一個show錢$1000,一集當一個show,而我同一集做『蔥蔥』都係當一個show。雖然係咁,但係我有兩個角色反而多咗演出。」

由於好多演員抗拒帶住頭套,而佢無抗拒反而更加落力咁做,連譚玉瑛姐姐都讚佢係做得最好嘅「蔥蔥」。做咗1年後阮政峰因為要拍《心路GPS》就正式離開《放學ICU》啦。