【安心偷食】仍然維護黃心穎 馬國明:唔使擔心我

「安心偷食」事件嘅男女主角已經先後開記者會及網上發道歉文,而無綫高層樂易玲喺今日下晝話馬國明表示自己OK,可以如常繼續往返無綫繼續為劇集《降魔的2.0》開工。

事情爆出一日後,馬國明終於現身。不過佢改掉以往習慣並唔係自己行去停車場上車,被人安排行一條秘密通道,馬國明媽媽更加一度幫佢睇水,盡母親責任保護馬明。馬明穿上深色外套,頭戴上深色Cap帽,個樣好明顯情緒低落,有記者上前影相都盡量避開鏡頭唔敢直視。

大約下午4點半,馬明到達無綫電視廣播城停車場,完成化妝後,馬明首度現身受訪。馬明開腔表示:「知道事件後,自己已經好快冇左嬲嘅感覺,希望成件事可以好快平靜落嚟。而家自己心情一樣好平靜,不過只係擔心心穎情緒唔穩定,亦都知道佢自己出咗IG聲明,我只可以話佢其實仲係好年輕,佢仲有好多路要行,希望大家都可以俾多啲空間佢。對於安仔記招會嘅回應都唔會有任何評價,只有安仔太太先有資格回應。我亦都唔希望傳媒打擾到我媽咪,其實一下間咁多支咪對住佢會驚,希望大家唔好嚇親我屋企人,亦都唔好將媽咪喺一個驚嘅情況下所講出嘅嘢去放大,大家高抬貴手,嚟緊我都仍然會專心工作,希望事件可以盡快平息,唔好再將件事去發酵繼續傷害到人,大家唔使擔心我。」

最後記者問與黃心穎嘅關係有冇變,馬明就冇回應,只係雙手合十話:「我冇咩講㗎喇,多謝關心,多謝大家關心。」

今次嘅風波,馬明好快平復自己心情不特止,仲仍然繼續幫黃心穎講好說話,得到網民大力支持,大嗌「馬明,加油啊!」!