【今晚大結局】《教束》題材貼地有共鳴 「靚仔高材生」唐浩然成功彈起

《教束》

ViuTV劇集《教束》Sell青春熱血,播出以來都備受好評,搵嚟廖啟智、陳秀雯、劉俊謙、朱栢謙及岑珈其等人主演,劇集以校園為題材,講述地區名校馬修書院嘅內部鬥爭之外,仲有探討精英學生壟斷及香港教育等等嘅弊病,不過一班逆權學生拒絕妥協。唔少有追看嘅網民都大讚劇集節奏明快、貼地有共鳴、笑中有淚、係現實社會嘅縮影,更被網民稱為神劇!

《教束》

除咗一班實力演員出演之外,劇集仲搵咗唔少新力軍演員參與,當中以飾演靚仔高材生鄧學謙嘅唐浩然(Jacky)最為突出。Jacky憑高顏值嘅外貌人氣急升,成功彈起,網民仲稱封佢做「零死角缺點王」。現年25歲嘅Jacky飾演中五學生,真係毫無違和感,劇中佢係精英學生、候選學生會「OASIS」會長(噚晚嗰集頂替麥浩然(岑珈其飾演)擔任學生會會長)兼評議會主席,佢深受低年級女同學歡迎,絕對係學校嘅風頭躉。

《教束》
《教束》

戲外嘅Jacky從小就立志做導演,喺演藝學院主修導演,喺讀書嘅時候已經有唔少作品,2016年畢業後就投身電影行業。不過喺一個偶然嘅機會之下,佢走到幕前,《教束》成為佢嘅處男作品。完成《教束》之後,佢仲有為港台劇集《快樂從心開始 2》單元劇及馮允謙《聲音導航》MV擔任男主角。

劇集喺今晚就會大結局,如果想知莊子(周漢寧飾)會唔會醒返,學生又可唔可以戰勝獨裁校長(廖啟智飾)嘅話,大家記得收睇啦!

《教束》