今年無綫劇集受歡迎CP 邊pair你最鍾意?

唔經唔覺已經嚟到11月,回望返2019年咁多個月,無綫劇集都出現咗唔少受歡迎嘅螢幕CP,佢哋有啲唔係第一次合作,有啲就係一拍即合,唔知以下你最鍾意又係邊pair呢?

蕭偉明/劉旭輝 & 章瑋/楊玉華《金宵大廈》

今年無綫話題之作《金宵大廈》,除咗題材破格及劇情緊湊之外,男女主角陳山聰及李施嬅嘅感情線同樣精彩,成功吸引唔少觀眾收睇。劇集主要講述佢哋呢段前世今生嘅孽緣愛情,前世係舞廳大班及警察配搭,今世就係空姐及大廈保安。唔少網民都好鍾意佢哋今次嘅演出,仲話要推舉佢哋做視帝視后。

龔燁 & 熊若水《愛‧回家之開心速遞》

處境劇《愛‧回家之開心速遞》入面龔燁(張景淳飾)與熊尚水(呂慧儀飾)嘅「龔水CP」深受觀眾愛戴。呢對歡喜冤家一時玩曖味,一時又鬥氣互寸,喺今年3月終於有突破性發展,正式成為情侶。

宋瑞輝 & 龍力蓮《愛‧回家之開心速遞》

如果要揀《愛‧回家之開心速遞》最受觀迎CP,相信唔少人都會選擇送水輝同大小姐「龍力蓮」呢一pair,「輝蓮CP」佢哋一個集團千金小姐,一個公司低級職員,原本大纜都扯唔埋,之後佢哋一直都要玩地下情,佢哋最終排除萬難,成功喺埋一齊。喺今年,大小姐仲為咗愛情放棄接龍集團,去咗送水輝間酒吧做老闆娘。

唐明 & 蘇怡《白色強人》

心胸肺外科主管醫生唐明(馬國明飾)與急症室醫生蘇怡(唐詩詠飾)喺劇中原本係離婚夫妻嘅關係,雖然佢哋已經離婚,不過佢哋喺公事上合作無間,兼仍然好關心對方,關係逐漸轉好。佢哋分開後,唐明同心胸科醫生程洛雯(李佳芯飾)產生微妙感情,不過喺劇集尾段呢對離婚夫婦都成功復合,仲再婚添呀!唔少網民都覺得佢哋好襯,仲話差啲俾佢哋嘅甜蜜情節閃盲。

尚垶 & 楊曉怡《鐵探》

由結婚到有小朋友,後分開再復合,尚垶(袁偉豪飾)同楊曉怡(王君馨飾)嘅感情一直得來不易,曉怡一直都唔贊成尚垶做前線警務人員咁危險嘅工作,而尚垶因工作而疏忽太太同囡囡。之後仲頭部中槍,導致有唔少後遺症。後期,曉怡決定支持尚垶參與警務工作及再次復合。不過故事並唔完美,最終尚垶難敵病魔,長眠浩園。

潘朵拉 & 傅子博《十二傳說》

劇集以懸疑驚悚為主題,本應就唔多感情戲份,不過就寫出一個三角戀關係,當然最後都係大團圓局。本身係突發新聞記者傅子博(蕭正楠飾)係鍾意自己徒弟黃玉(劉佩玥飾),但後來竟然因為查案問題有時需要向民俗學助理教授潘朵拉 (林夏薇飾)請教,及歡喜冤家模式咁破解問題。最終佢哋互相欣賞,有情人終成眷屬。

郎朝勇 & 貝競枝《婚姻合伙人》

劇集以地產為背景嘅輕鬆小品劇,劇情講到郎朝勇(楊明飾)與貝競枝(高海寧飾)識於微時,好多事情兩人都可以唔出聲就有共識。呢種默契同共識令佢哋合作經營劏房生意,最終更一齊開設一間地產代理公司再結為夫婦。工作期間,郎朝勇愛妻心切幫貝競枝頂罪入獄,貝競枝一力照顧公司,偏偏耐不耐就有奸人所客導致公司陷入財務危機,最終貝競枝更要投靠前男友邢呇(黃德斌飾)。曾經更被邢呇金錢引誘而無法抗拒,曾一度與郎朝勇分開及拆夥,幸好貝競枝知道一個男人專一比一個有錢男人更有安全感,所以佢最終都係與郎朝勇復合。

敖熙辰 & 蔣穎欣《解決師》

佢哋呢段感情夾雜友情及愛情,劇中敖熙辰Karson(王浩信飾) 身手了得又受過軍訓,佢係一個協助黑幫解決唔同難題嘅解決師。但Karson因為要逃避黑幫大佬追殺,唔單止要扮死,佢仲改名換姓及成為中學體育老師Orson,點知就俾佢係學校到遇著黑幫千金兼音樂老師Jovy(唐詩詠飾)。最估唔到Jovy嘅黑幫爸爸蔣滔(羅樂林)患有腦血管瘤更被暗殺身亡,所以Jovy只好接替爸爸滔天集團主席。但Jovy成為主席後經常受其他黑幫威脅,所以Orson原本為黑幫而逃離香港,結果而家要為左保護Jovy而再次跟黑幫中人打交道。今次王浩信及唐詩詠繼《不懂撒嬌的女人》再度合作,成功吸引唔少觀眾期待。