今個星期睇咩戲 泰國女神大戰殺神奇哥

今個星期泰國電影來勢洶洶,分別派出女神同撞邪少女大戰美國男神奇洛李維斯。雖然題材不一,談情、凶靈到見人殺人、永無失手嘅動作片,睇牌頭理應各有目標觀眾,但睇真啲又似搶緊同一班客喎!

《殺神John Wick3》血腥暴力似對準男性觀眾,偏偏主角係極有女觀眾緣嘅奇哥擔任,加上香港女士口味中性,太婆媽嘅戲反而唔受,《殺》絕對有機會成為女士首選!《去吧!女神兵團》談情說愛以兵仔視點出發,女主角阿靜幾靚下,會唔會成為巴打們今個星期首選電影?

《殺神John Wick 3》

殺神John Wick(Keanu Reeves飾)違反殺手界天條,在殺手酒店殺死一名高級成員後,被酒店老闆榮士敦革除殺手會籍及發出高達1千4百萬美金懸賞令追殺,只給他黃金一小時逃生;連他的恩師 - 殺手集團高層「The Director」(Anjelica Huston飾)亦無計可施。當全城殺手都盯著殺神這塊肥肉時,他得到昔日戰友蘇菲(Halle Berry飾)拔刀相助。兩人面對無盡殺機,為了生存,只有殺得更兇狠!

《殺神》系列越戰越勇,少數續集質數超越首集!奇洛李維斯型係事實,勁在拍足咁多年,低調做人、唔炒作新聞,一樣無損人氣,仲繼續創出經典角色!今集隻狗狗繼續重戲!

《去吧!女神兵團》

故事講述阿柏與阿靜由中學開始一直是互有好感的密友,卻唯恐分手收場而不敢突破友情關口。10年來,收到「好人卡」的阿柏默默守候女神身邊,24小時隨傳隨到。二人雖然戀人未滿,但比情人更重要。直至阿靜盲舂舂戀上視為結婚對象的屈機型人阿泰,阿柏才真正覺得危機殺到。於是當兵多年的他決心向阿靜真情表白,誓要跳出Friend Zone,但要將女神追到手又談何容易?

電影由《出貓特攻隊》製作天團打造,呢隊創作大腦暫時套套出品都水準上乘,今轉玩「女神大派好人牌」,又可以玩出咩意外驚喜呢?

《飛人類之吻》

故事講述二戰時期,住在泰國村落裡的少女阿珊,被民間流傳的邪靈「飛頭鬼」賦予魔力,每逢午夜,頭顱便會與肉身分割,連帶著內臟飛到半空中到處吸血覓食。知道這個秘密的人只有她的青梅竹馬阿來,但阿來不但沒有被嚇退,二人在日間努力過著平凡的生活,隱瞞村民。二人漸生情愫之際,黑夜中的阿珊始終無法扭轉宿命,頭顱再次跟肉身撕裂……

泰國人嘅創意令人五體投地,佢地拍鬼片已經去到大師級。拍咗咁多都仍然有新嘢玩,今次齋玩個頭仲要談戀愛,咁嘅組合真係得泰國朋友先諗得出!