今個星期睇咩戲 《復4》後新片湧現

《復仇者聯盟4》不經不覺上咗2個星期,雖然唔少fans要睇多幾次先夠喉,不過每周新片上映數量終於開始回復正常。今個星期最少有5部新片上映,合家歡、笑片、恐怖片樣樣齊,終於多返幾個選擇!

《POKÉMON 神探Pikachu》

神探Harry Goodman神秘失蹤,其21歲兒子Tim決心查出真相。他得到爸爸的精靈助手 – 幽默活潑、可愛又迷糊的神探 Pikachu協助調查。只有Tim才能聽到Pikachu說話,於是他們聯手一起去破解這個複雜的謎團。他們於人類和POKÉMON和諧共存的瑞美市追查線索,遇到各種各樣的POKÉMON,揭發了一個足以破壞人類和POKÉMON和諧共存、威脅整個POKÉMON宇宙的驚天陰謀。

睇上面個故事大綱真係睇到想大叫POKÉMON!由動畫改成荷里活真人版,再加上Ryan Reynolds(佢聲演Pikachu,廣東話版本由鄭中基配音)非常出力瞓身宣傳,令我明白故事都唔太重要,反正Pikachu外貌可愛但實際已經成為麻甩佬。

其實依家改片名都幾高難度,唔想用官方中文「寶可夢」又唔用得「比卡超」,結果個所謂中文片名得「神探」2個字。

《圓美大盜》

祖絲芬(Anne Hathaway 飾)是個高貴又魅力四射的英國女人,憑著其高超詐騙手法,呃盡世上每個角落的富豪,斂來巨額財富現居於法國濱海博曼。祖絲芬有規律、富貴但又高風險的人生,因碰上專門在酒吧揾食的圓潤小混混佩妮(Rebel Wilson 飾)的介入,受到衝擊!

騙徒手法有高有低又層出不窮,但祖絲芬和佩妮卻口徑一致 — 瞄準所有賤男渣男,騙走他們財富,為女人出一口氣!

本片最大賣點係Anne Hathaway扮八婆,點解好笑?因為佢疑似唔覺意得罪媒體而得到一個難搞嘅朵,難得佢又唔介意笑返自己,接啲衰衰地少少mean嘅角色,零負擔豁出去又點會唔好睇!

《無痛奇俠》

小男孩希瓦患有「先天性無痛症」,天生沒有痛感,受傷流血也不會痛,但因為連口渴的感覺也沒有,所以必需時時補充水分。身患怪病,總是遭受同學們的霸凌,搞得渾身是傷,不過鄰居女孩蘇佩總是會挺身捍衛他。

一日,希瓦為了保護蘇佩,行俠仗義展開第一次突襲,卻導致全家被鄰居驅逐,他和蘇佩被迫分開。希瓦(阿希馬努達西尼飾)長大後,展開人生冒險,遇到他幾乎認不出來的蘇佩(拉希卡瑪丹飾)。希瓦瞭解到他的使命就是幫他的偶像馬尼拿回珍貴的父親的遺物,迎來人生第一場史詩級大戰!

會喺香港上映嘅印度電影通常都感人、勵志同好正面,呢套《無痛奇俠》都唔例外,笑料中講下人生道理,睇得舒舒服服!

魔詭怪胎

單親媽媽Sara(Taylor Schilling 飾)發現兒子Miles行為日漸詭異,懷疑他遭到邪靈附身,失去自我。出於母親的天性,Sara一方面繼續保護Miles,另一面則出盡辦法調查是什麼人或事令Miles有邪惡的轉變。Sarah被迫由過去著手,但過程中感知與現實之間的界線卻逐漸變得模糊…

單親媽媽由曾榮獲金球獎及艾美獎提名的Taylor Schilling 飾演,睇得出幕前幕後都好出力做出好成績,可惜故事玩唔出咩新意思,有驚嚇位不過個故事太估到囉!

《過春天》

16歲的佩佩(黃堯 飾)每天跨境由深圳到香港上學,命運就夾在兩座城市之間。她為了實現與好友(湯加文 飾)到日本賞雪的約定,四出打工努力儲錢,後來因一次意外,發現跨境之路竟可成為賺錢捷徑,她開始冒險走私水貨手機,慢慢沉溺在虛榮的快樂、朦朧的好感與歸屬的溫暖。她拼命想越過成長的關卡,卻像困在魚缸裡的小鯊魚,看不到未來……

內地班底拍一個(定半個?)香港故事,走水貨、單非等經常出現於香港人嘅日常生活或談論話題中,到底算唔算係香港問題?電影仲有我地熟悉嘅江美儀同廖啟智,以及香港演員孫陽。《過》滲出淡淡香港味,同時又透露出一絲絲陌生,其實都幾似依家嘅香港。