今個星期睇咩戲 多元化到一個點!

今個星期上映新片都幾精彩,有音樂、有懸疑有外地有本土,仲有部份係新導演、新演員作品,全部都交出亮眼成績。我地事不宜遲,快啲嚟睇下今個星期有咩新片上映。

歌壇天后Lady Gaga進軍大銀幕《星夢情深

《星夢情深》(A Star is Born)原裝故事已經係第4次翻拍,不過拍得好睇的話橋係唔怕舊嘅,何況仲有型男Bradley Cooper自導自演。故事講述音樂人Jackson Maine(Bradley Cooper飾)發掘了Ally (Lady Gaga 飾),2人相知相戀,Ally夢想成真成為樂壇新星,但Jackson的心魔令2人開始產生隔膜。 2位演出非常動人,Lady Gaga為電影所創作嘅音樂亦令人聽出耳油。

#starringjohncho《人肉搜尋

《人肉搜尋》(Searching)係導演安尼遜查格提 (Aneesh Chaganty) 首部自編自導的劇情長片。全片只係拍左13日,但後期製作用左2年!嗱,拍攝時間短唔等如唔好睇,呢套《人肉搜尋》可以話技驚四座,全片102分鐘零冷場,結合社交媒體facebook、Instagram等等版面,帶住觀眾一齊追尋失蹤女兒下落。電影指出社交媒體嘅假像,人前嘅光鮮亮麗不一定係真實,就算日日見住都唔見得理解個女,而飾演父親嘅John Cho真係好好戲,全程以細微嘅表情變化帶動劇情發展(得啲對話框框、手搖嘅「扮」手機拍攝片,要交戲好難),早2年已經有網友發起#starringjohncho絕對事出有因。

日本懸疑大師東野圭吾 x 三池祟史《拉普拉斯的魔女

東野圭吾小說近年不斷被改編成電影,其作品有緊張謎案仲寫出唔少人性悲歌。今次故事源起於溫泉地區發生了硫化氫中毒死亡事件,參與調查的地球化學教授青江修介(櫻井翔 飾)以「人無法用自然現象當凶器」為由判定是意外,然而自稱「拉普拉斯魔女」的神秘少女羽原圓華(廣瀨鈴 飾)出現,讓案情再度陷入膠著,更令青江教授對自己信念動搖。

本地薑溫馨之作《女皇撞到正

近年娜姐同秀娜華麗轉身成為女演員,唔賣身材賣演技,《29+1》讓人可憐可憫,仲有份入圍爭影后。今次喺《女皇撞到正》,飾演黑仔但很堅強很堅強很堅強嘅女生一樣咁得人鍾意。美琪(周秀娜飾)無父無母,努力工作事業略有所成,不過運滯嘅佢一夜之間男友同份工通通冇晒,仲要禍不單行被流星雨隕石碎片擊中而重傷昏迷,心臟停頓7分鐘!從此就見到鬼,被打扮80年代的阿伯(吳耀漢飾)、中年漢爆牙輝 (葛民輝飾)及Auntie (邵美琪飾)纏住,搵個靈媒張子進(張繼聰飾)幫手,點知無能力驅鬼,卻成日被上身!

唔係恐怖片亦唔係搞事片,成班鬼都係好鬼嚟嘅,都係想大家明白人生咩先係最重要。張繼聰密密拍不過套套都好俾力,套戲另一亮點應該係葛民輝,好耐無睇過佢做戲!

萬聖節應節之選《血祭哈囉喂》、《魔鐘奇幻屋

唔睇真啲會以為《血祭哈囉喂》(Hell Fest)係某主題公園嘅宣傳,因為套戲取景於外國「哈囉喂」主題樂園,講述變態「面具殺人狂」大模斯樣走入主題公園大開殺戒。參加者還以為是遊戲一部分樂在其中,卻不知道自己已經成為狂魔獵物,危在旦夕。

時有聽聞啲MK仔為咗威威而喺「哈囉喂」鬼屋追打扮鬼嘅演員。希望呢班兒童睇到呢套戲啦……

《魔鐘奇幻屋》( The House With A Clock In its Walls)

講明先,呢套睇落似魔幻童話,不過有啲位都幾黑暗下,打算帶幼兒入場嘅家長要注意下。故事講述10歲孤兒路易(Owen Vaccaro 飾),來到小鎮投靠叔叔祖尼芬(Jack Black 飾)。除了發現叔叔是巫師之外,屋中的家具、擺設、彩色玻璃窗及花園中的植物,彷彿全部都有生命。為了拯救快將滅亡的世界,他與叔叔及鄰居的女巫森瑪曼Cate Blanchett 飾),必須合力找出藏在大屋裡的魔鐘,才可解除倒數中的末日魔咒。

因為 Cate Blanchett同Jack Black而入場嘅觀眾可能會失望,因為2位戲份算唔上有發揮。

少女成長日記:《性教獄》

改編自同名暢銷小說,《性教獄》(The Miseducation of Cameron Post)喺2018年辛丹斯電影節獲得評審團大獎。少女金梅倫(《勁揪俠》個紫天椒妹妹Chole Grace Moretz飾)於學校舞會中與女同學在車上親熱後,被校方發現繼而送往治療中心進行性取向改造。導師用盡強硬手段及福音搖滾樂,強行把學員「拗直」,但滿腦同性春夢的金梅倫不但沒有受影響,反而結識到一班同志死黨,一同在迷失中找回真實的自己,向荒誕的治療說不﹗

好荒誕?我有一刻覺得香港真係會發生呢啲事。

貓奴必睇:《貓之cafe

愛貓人士應該可以睇好多次,故事講述一間位於秋葉原的貓Café「Mocha」,由櫻木櫻(久保由利香 飾)經營,佢除左照顧一班貓店員,仲要每天照顧有各色各樣到Café 尋求貓咪的慰藉嘅客人。受到都市生活壓抑嘅大家,從貓店員身上得到片刻寧靜、暫時遠離塵囂。如果搞個特別場有貓陪睇的話……啲貓應該唔理你,摸黑瞓晒。