今個星期睇咩戲 合家歡片大哂

今個星期正式放暑假過happy summer,唔知係咪父母要搵節目照顧屋企啲「老細」,今個星期3套新上映嘅都係合家歡電影,分別係隔足14年先出嘅續集《超人特工隊2》、日本版「愛回家」《嫲煩家族3走佬阿嫂》及回到溫拿樂隊少年時嘅《兄弟班》。

迪士尼彼思出手 唔會失手《超人特工隊2》

少數隔足咁多年先出續集嘅動晝,14年後片中一眾主角同《叮噹》一樣,依然維持上集年紀,所以可愛嘅Jack Jack仲係BB一個。今集到阿媽彈弓女俠做主角,佢主外老公超能先生主內,全職湊1個青春期懷春少女小麗、成日無時停嘅小學雞小衝,同埋唔知佢想點又睇少陣都唔得嘅Jack Jack BB。成個故事唔複雜,但緊貼現時話題,超級英雄家庭都要兩性平等,男人做到嘅女人都一啲都唔輸蝕,不過事業家庭要平衡都好需要家人配合,一家人齊齊整整團結一心,自然其利斷金。今集,Jack Jack好搶鏡!

家庭日常無大事 有笑有淚《嫲煩家族3走佬阿嫂》

繼續有關平田家嘅逸事。屋企瑣碎事拍得咁好睇,導演山田洋次功力深厚!家族系列來到第3集,第一集老爺奶奶想離婚,班仔女即刻商討對策;第二集力勸老爺年事已高唔好再揸車,到今次第3集終於到萬能主婦阿家嫂做主角!家嫂全屋大小事務全包,日做夜做無停手,家中遇爆竊私己錢被偷,本來已經好肉赤,老公仲要唔體諒怪佢唔小心,嬲起上來決定離家出走!正所謂唔走唔知家嫂好,班男人無左萬能家嫂照顧,差啲屋都燒埋!所以做老公或老婆都好,千祈唔好老奉,唔係後悔都無用。

香港情懷 溫拿樂隊青春勵志成長史《兄弟班》

溫拿樂隊係華語樂壇傳奇,70年代成軍到而家近半世紀,年輕一輩可能對「溫拿樂隊」好陌生,樂隊成員分別係譚詠麟、鍾鎮濤、彭建新、陳友同葉智強,睇左成員名單應該識得佢地啦啩?今次《兄弟班》由陳友執導拍返自己隊band嘅故事。係,如果你睇《殭屍》先識陳友,咁你未必知 —佢喺八九十年代做過導演,而本來喺溫拿,佢係鼓手嚟嘅。

《兄弟班》除左講左溫拿如何組成,仲講左成長嘅煩惱,雖然背景定於70年代,無網上又無社交媒體,但任何時侯玩音樂條路都唔易行,事隔幾十年做父母都仲係介意仔女玩音樂,擔心仔女前途!不過《兄弟班》咪真人示範俾你睇,有想做嘅事要堅持,就算同一隊band,兄弟5個人生都各有不同,做朋友唔係得把口,真心朋友係有事無事都會陪住你!