手袋仲未搵得番!莊思明認為有人預謀犯案

慘!

藝人莊思明昨日在旺角拍攝劇集《超能使者》時,被偷手袋及盜用信用卡約57,000港元。今日思明接受電話訪問時表示心情仍然低落,她透露昨日上午九時許到達現場,一直留在公司的服裝車內直至十二時才離開車廂拍劇﹕「我約一點二十分上到車就發現手袋唔見咗,後來接到手機短訊有人用我張卡買嘢,第一單交易係一點四十二分,夾埋有十次交易,我跟住就cut晒所有卡同報警,警察嚟到調查,跟住我去警局錄口供途中,警方已經拘捕到嗰兩個碌我卡嘅疑犯。」

思明指今次是閉門失竊,因為一般人不能登上服裝車:「車上有車長,唔會隨便畀人上嚟,連特約演員都唔上得車,我亦肯定唔係現場演員做,因為其他人遲過我上車,所以事件好奇怪,我以前都有聽聞有同事喺服裝車唔見錢,但冇咁誇張成個袋拎走。(公司點處理?)公司知道呢件事,但唔知佢哋會點做。(下次會點防犯?)我都唔會,下次再拍劇惟有乜都唔帶,唔好放貴重嘢喺車。(損失幾多?)夾埋個袋就六、七萬。雖然依家捉到人,但手袋係搵唔到,我所有證件同卡都要申請過。估唔到開個幾鐘工就唔見咁多錢,我係第一次唔見嘢。」

她覺得這次偷手袋是有預謀犯案,不排除有人將手袋交給犯人用其信用卡購物:「希望早日搵到係邊個做,唔好再發生類似事件,依家周街都係天眼,有信心警方會拉到人,交畀警方去處理。」